Ўзбекистоннинг 38 та олийгоҳи Осиё рейтингига кирди

Quacquarelli Symonds халқаро рейтинг агентлиги эълон қилган натижалар ҳақида «Дунё» ахборот агентлиги вазирлик маълумотларига таяниб хабар берди.

Ўзбекистон олийгоҳлари орасида «ТИҚХММИ» Миллий тадқиқот университети етакчи бўлди. У Осиё бўйича 113-ўринни, Марказий Осиёда эса 4-ўринни эгаллади. Ўзбекистон Миллий университети Осиё рейтингида 196-ўринни, минтақавий рейтингда 9-ўринни банд этди.

Юқори натижа қайд этган олийгоҳлар қаторига қуйидагилар ҳам кирди:

• Самарқанд давлат университети — 215-ўрин;

• Тошкент давлат иқтисодиёт университети — 255-ўрин;

• Тошкент давлат техника университети — 281-ўрин.

Жами 19 та Ўзбекистон олийгоҳи рейтингнинг дастлабки мингталигидан жой олди. Жумладан, юқоридаги бешта университетдан ташқари яна 14 та олий таълим муассасаси 469–1000-ўринлар оралиғида қайд этилди. Улар орасида Наманган, Тошкент, Урганч, Қарши, Бухоро, Фарғона, Жиззах ва Нукусдаги олийгоҳлар бор.

Қолган 19 та олий таълим муассасаси 1001+ ўринлар тоифасига кирди. Андижон давлат университети, Марказий Осиё университети, Ўзбекистон давлат жаҳон тиллари университети ва Гулистон давлат университети шулар жумласидан.

Вазирликнинг таъкидлашича, натижалар мамлакат олий таълим тизимидаги ислоҳотлар, илм-фан ва таълим интеграцияси ҳамда халқаро ҳамкорлик кенгайиб бораётганини акс эттиради.