Нуразиз Унгбоев 18 ёшда. У дунёнинг топ-20 олийгоҳлари қаторида турадиган Чикаго университетига тўлиқ грант билан қабул қилинган. Ўқитувчилар оиласида катта бўлган Нуразиз Kun.uz мухбири билан суҳбатда топ университетгача босиб ўтган йўли, ўрта таълимдан сўнг нима учун бир йил танаффус олгани ва муваффақият сири ҳақида гапириб берди.
Нуразиз Унгбоев математика ва информатика бўйича қатор олимпиадалар совриндори. У Robocontest.uz платформаси лойиҳа менежери бўлиб ҳам ишлаган. Нуразизнинг фикрича, ундаги илмга бўлган қизиқиш тасодиф эмас, балки оиладаги муҳит маҳсули.
“Бизнинг уйимизда ҳамма – опаларим, онам ҳам устоз. Дадам эса Ўзбекистон Миллий университетида математика фанидан дарс беради. Уйга келганимда доим кимдир китоб ўқиётган бўларди. Катта кутубхонамиз бор эди. Ана шу муҳит таъсирида 13 ёшимдан математикага қизиқа бошладим ва олимпиадалар билан жиддий шуғулландим”, — дейди у.
Нуразиз мактабни битиргач, олий таълим муассасасига ҳужжат топширмай, бир йил тайёргарлик даври (gap year) олишга қарор қилганида яқинлари ва атрофидагиларнинг қаттиқ қаршилигига дуч келган.
“Бир йил gap year олганимда қариндошларимиз, ўртоқларим: ‘Нега бундай қиляпсан? Ўзбекистонда ҳам топ университетлар бор-ку, шу ерда ўқишинг мумкин’, деган гапларни кўп айтган. Лекин ўзимга жуда ишонардим ва топ университетга киришимга ишончим комил эди. Шунчаки уларнинг гапларига эътибор бермадим. Фикримни ўзгартирмаслик учун уларнинг кўзига камроқ кўринишга ҳаракат қилдим”, — дейди Нуразиз.
Дунёнинг нуфузли олийгоҳлари орасидан нега айнан Чикаго университетини танлагани ҳақида гапираркан, у олий таълимдаги энг муҳим мезонлардан бири – талабанинг қадриятлари университетники билан мос келиши кераклигини таъкидлайди. Унинг фикрича, кўплаб ёшлар университет номига эътибор қаратади, бироқ муваффақиятнинг асосий омили муҳит ва қадриятларнинг мослигидир.
“Топ университетларда қадриятлар ва мослик деган тушунчалар бор. Яъни сизнинг қадриятларингиз университет қадриятлари билан мос келиши керак. Менга энг мос келгани Чикаго университети бўлди. Сабаби, уларнинг илмга бўлган ҳурмати ва эътибори жуда катта. Ҳар бир талаба билан суҳбатлашганингизда, асосан илм-фан ва тадқиқотлар ҳақида гаплашасиз. Ушбу университет битирувчилари орасидан 101 нафар Нобел мукофоти совриндори етишиб чиққан. Бу эса университетнинг дунёдаги энг етакчи олийгоҳлардан бири эканини кўрсатади.
Нобел мукофотини қўлга киритиш менинг ҳам асосий мақсадларимдан биридир”, — деди у.
Интервюни тўлиқ ҳолда Kun.uz’нинг YouTube’даги канали орқали томоша қилиш мумкин.
