7 ноябр куни полшалик 24 ёшли Михал Оксинский ота-онаси ва синглисини отиб ташлагач, Краков марказига келди ва шаҳар майдонидаги ўткинчиларни ҳам ўққа тутди. Ҳужум оқибатида олти киши ҳалок бўлиб, 15 киши жароҳат олган. Оксинскийнинг ўзи ҳам полициячилар билан отишмада яраланиб, кейинроқ шифохонада вафот этган. Полша ҳукумати ҳодисани теракт деб атаган, шу билан бирга, жиноятчининг мотиви аниқ эмас: Оксинский ўзидан хат ҳам, замонавий Полша тарихидаги энг ажалвор оммавий қотилликни нима учун содир этганини изоҳлаши мумкин бўлган манифест ҳам қолдирмаган. Қуйида Краковдаги отишма ижрочиси ҳақида ОАВ аниқлаган маълумотлар келтирилади.
24 ёшли Михал Оксинский – ўқ отиш ҳоббиси бўлган чилангар. У тахминан 60 минг аҳолига эга бўлган ва Краковдан 200 километр масофада жойлашган Островец-Свентокшиский шаҳрида яшаган. Оксинский техникумни тамомлаган ва Островецдаги оловга чидамли материаллар заводида чилангар бўлиб ишлаган. Онаси сотувчилик қилган, отаси электр ишлари билан шуғулланган, синглиси Краков санъат академиясида ўқиган. Оксинский муқаддам судланмаган ва армияда хизмат қилмаган.
Унинг ўзида ҳам, отасида ҳам қурол ишлатишга рухсатномаси бўлган. Оксинский 2022 йилдан буён ўқ отиш клуби аъзоси ҳисобланган, 2026 йил бошидан ушбу клуб аъзоси сифатида иккита қурол – винтовка ва тўппончага эгалик ҳуқуқини қўлга киритган. Унинг отаси эса яна тўққизта қуролга эгалик қилган. Краковдаги ҳужумдан кейин Оксинскийнинг ёнидан иккита тўппонча, AR-15 русумли иккита винтовка ҳамда ушбу қуроллар учун мўлжалланган 500 га яқин патрон топилди. У жуда кўпчиликни ўлдиришга тайёрланиб келганди – бунда ўзиникидан ташқари отасининг қуролларидан ҳам фойдаланмоқчи бўлган.
Оксинский ҳужумдан олдин ўз оила аъзолари ҳамда уйдаги жониворларни ўлдирган. Оила яшаган квартирадан унинг 53 ёшли отаси Януш, 52 ёшли онаси Рената ва 21 ёшли синглиси Магдаленанинг жасадлари топилган. Ота ва сингил ухлаётган жойида, она – ошхонада ўлдирилган; уларнинг барчаси тунги кийимда бўлган. У ҳар бир қурбоннинг бошига иккитадан ўқ узган. Шунингдек, Оксинский уйдаги икки мушукни ҳам отиб ташлаган. У қўшнилар эшитмаслиги учун овоз пасайтиргичдан фойдаланган бўлиши мумкин. Шундан кейин Оксинский отасининг машинасини олган ва Краковга йўл олган. Нега айнан шу шаҳарга келгани номаълум.
Жиноятчининг мотиви бўйича асосий версиялардан бири – ултраўнг экстремизм. 10 ноябр куни Полша адлия вазири Валдемар Журек Оксинский Андерс Брейвик ҳақидаги сайтларга кириб тургани, уйида Гадсден байроғи осиғлиқ тургани, иш жойида ҳам ултраўнг экстремизмга мойиллигини кўрсатувчи символика топилгани ҳақида маълум қилди. Журекнинг фикрича, булар мотив бўйича Полша ички ишлар вазирлиги томонидан илгари сурилган фаразни қўллаб-қувватламоқда, бироқ у ҳали тўлиқ исботланмаган.
