Tramp: AQSh IShIDga urush e'lon qilishi kerak

AQSh prezidentligi uchun Respublikachilar partiyasidan deyarli yagona nomzod hisoblanuvchi milliarder Donald Trampning bayonot berishicha, agar u davlat rahbari lavozimiga saylangudek bo‘lsa, mamlakat Kongressiga murojaat qilib, IShIDga urush e'lon qilishni so‘raydi. Bu haqda milliarder Nitstsadagi qo‘poruvchilikdan so‘ng, Fox News telekanalida qilgan chiqishida ma'lum qilgan. 

"Bu urush va biz harbiy libosga ega bo‘lmaganlar bilan urushmoqdamiz", - degan Tramp. 

"Bu odamlar bizning mamlakatimizga kelmoqda va ularning kimligini, qayerdan kelganligini ham bilmaymiz, hatto", - deb qayd etgan milliarder. 

Donald Tramp, boshlovchining, agar Tramp prezident bo‘lsa, IShIDga qarshi rasman urush e'lon qilishni so‘rab, Kongressga murojaat qilarmidi? - degan savoliga - "Qilar edim", - deya javob bergan.

Respublikachi nomzod, yana bir marta IShIDga qarshi jangovar harakatlarda NATOdan foydalanish zarurligiga urg‘u bergan. 

"Biz NATO uchun ulkan mablag‘ sarflamoqdamiz va mazkur xarajatlarni oqlashimiz ham kerak", - degan Tramp. 

The Washington Post gazetasining yozishicha, Kongress 74 yildirki hech kimga urush e'lon qilmagan. Kongress bundan avval, 1812-yilgi urush, amerika-meksika, ispan-amerika, Birinchi va Ikkinchi jahon urushlarida ushbu vakolatidan foydalangan va rasman urush e'lon qilgan.