Bangladeshda hind serialining salbiy ta'siri o‘zini namoyon qildi

Bangladesh sharqidagi qishloqlardan birida hind seriali yuzasidan vujudga kelgan tortishuv jiddiylashib, ommaviy to‘polonga aylangan. Buning oqibatida 100 kishi jarohatlangan, deb xabar qilmoqda Frans Press agentligi politsiya idorasiga tayangan holda. 

Ma'lum bo‘lishicha, Habiganj tumanining bir guruh fuqarolari Dhol qishlog‘idagi restoranda bengal tilidagi, insoniyatni yovuzlikdan qutqaruvchi jangchi-malika hayotidan hikoya qiluvchi "Kiranmalu" (Kiranmala) – teleserialini tomosha qilish uchun to‘planishgan. 

Tomosha chog‘ida paydo bo‘lgan tortishuv, avvaliga dahanaki jangga kuchayib, so‘ngra ur-yiqitga aylangan. Alamzada serial muxlislari restoranni vayron qilishgach, bir-birlarini tayoqlar bilan urib, pichoqlagan. Voqea joyiga yetib kelgan politsiya xodimlari o‘zidan ketgan kinomuxlislarni tinchlantirish uchun rezina o‘qlar va yosh oqizuvchi gazdan foydalangan. 

"Gap shundaki, ikki erkak serialdagi epizodlardan biri bo‘yicha tortishib qolgani masalani guruh-guruh bo‘lib hal etishga aylanib ketgan", — degan politsiya vakili. 

Jarohat olgan yuz kishidan 15 nafarini shifoxonaga yotqizishga to‘g‘ri kelgan.