Useyn Bolt o‘zini Pele va Muhammad Ali bilan tenglashtirdi

Endilikda 8 karra Olimpiya chempioni, yamaykalik mashhur sprinter Useyn Bolt unga sportda boshqa hech narsani isbotlashga hojat qolmaganini aytdi. U bunday fikrni Olimpiya yangiliklar xizmatiga bildirdi. 

Yamaykalik sprinter Rioda 200 metrga yugurish musobaqasida o‘zining sakkizinchi Olimpiya oltin medalini qo‘lga kiritdi. U masofani 19,78 soniyalik natija bilan bosib o‘tdi.

"Menga boshqa hech narsani isbotlashga hojat qolmadi. Men buyuk ekanligimni dunyoga yana nima bilan isbotlay? Men mashhur futbolchi Pele va afsonaviy bokschi Muhammad Ali kabi sportchilardan biri bo‘lishga harakat qilganman. Umid qilamanki, men bu Olimpiadadan keyin ulardan biri bo‘ldim", deb aytdi sprinter.

Bolt, shuningdek, Riodagi Olimpiada uning faoliyatidagi so‘nggisi bo‘lishini ma'lum qildi. "Fikrimcha, bu mening oxirgi O‘yinlarim bo‘ladi", deb aytdi 29 yoshli Bolt.

Bolt 8 karra Olimpiya chempioni, 11 karra jahon chempioni hisoblanadi. Uning natijasi yengil atletika tarixidagi eng yaxshi natija hisoblanadi. 

Sportchi 100 metr (9,58 soniya) va 200 metrga yugurishda (19,19 soniya) amaldagi jahon rekordsmeni hisoblanadi.