Filippin BMTdan chiqish bilan tahdid qildi

Filippin prezidenti Rodrigo Duterte ma'lum qildiki, mamlakat BMT a'zoligidan chiqishi mumkin. Reyter agentligi xabariga ko‘ra, bunga tashkilot tomonidan Filippin politsiyasi narkotiklar savdosiga qarshi reydlarda qotilliklarga yo‘l qo‘yishda ayblagani sabab bo‘lgan.

20 avgust kuni BMT Filippin hukumatini inson huquqlariga qarshi usullari uchun qoralagandi va tartibsiz ravishda qotilliklar sodir etishni bas qilishga chaqirgandi. Tashkilot iddaosiga ko‘ra, Filippinda jinoyatda gumonlanuvchilar sud-so‘roqsiz otib tashlanmoqda.

Duerte bu o‘limlar politsiya faoliyati bilan bog‘liq emasligini aytib, BMTni diqqat bilan tekshiruvlar o‘tkazishga chaqirgan. Prezident tashkilotni va uning a'zolarini, xususan Filippinning yaqin ittifoqchisi hisoblanmish AQShni ayblab, BMT o‘z vazifalarini bajarmayotganini ta'kidlagan.

"Sizni kamsitishni istamayman. Lekin ehtimol biz BMT bilan xayrlashishimizga to‘g‘ri kelar. Biz nega bu ahmoqlarni tinglashga majbur bo‘lishimiz kerak?", — degan u telemurojaat vaqtida.

Duerte Xitoy va boshqa yirik davlatlar bilan boshqa muqobil tashkilot tuzish ehtimoli haqida gapirgan.

Rodrigo Duterte giyohvandik muammosiga qarshi katta kurash boshlagan. Agentlikning qayd etishicha, uning prezidentligi davrida narkotiklar savdosiga aloqador 900 kishi o‘ldirilgan.