Turkiya bosh vaziri Rossiya tomonidan Injirlik aviabazasi ishlatilishi mumkinligini aytdi

Turkiya bosh vaziri Binali Yildirim Rossiya Turkiya janubidagi Injirlik aviabazasidan foydalanish iltimosi bilan murojaat qilmaganini, biroq agar zarurat bo‘lsa u bu bazadan foydalanishi mumkinligini aytdi. Bu haqda Anadolu axborot agentligi xabar berdi. 

"Bu axborot noto‘g‘ri, biroq zarurat bo‘lsa, Injirlik bazasi qo‘llanishi mumkin", deb aytdi Yildirim Rossiya Injirlik aviabazasidan foydalanish haqida so‘ragani haqidagi savolga javoban.

Yildirim Rossiyada bu bazadan foydalanishga ehtiyoj borligi dargumonligini aytdi.

"Undan AQSh va Qatar foydalanmoqda. Boshqa davlatlar ham bu bazadan foydalanishi mumkin. Rossiyaga kelsak, bunday murojaat olinmagan. Fikrimcha, bunga unda hojat ham yo‘q. Chunki Suriyada ikkita baza bor. Masofadagi farq 100-150 km ni tashkil qiladi", deb tushuntirdi Yildirim.

Avvalroq Rossiya harbiy-koinot kuchlari Suriyada jangarilarga zarba berish uchun Eronning Xamadan aerodromidan foydalanishni boshlagani ma'lum qilingandi.