Lola Karimova o‘zbekistonliklarga qo‘llab-quvvatlov uchun minnatdorchilik bildirdi

O‘zbekiston Respublikasi Prezidenti Islom Karimovning kenja qizi Lola Karimova-Tillayeva o‘zbek xalqini Mustaqillikning 25 yillik bayrami bilan tabrikladi va o‘zining feysbukdagi sahifasida yurtdoshlarimizga samimiy tilaklar bildirdi. 

"Aziz yurtdoshlar, sizni barchamiz uchun qadrli ayyom – O‘zbekistonning Mustaqillik kuni bilan chin ko‘ngildan muborakbod etaman!

Men bizning bag‘rikeng, mehnatkash va nihoyatda iqtidorli xalqimizga baxt-saodat va farovonlik tilayman! Saxovatli ona zaminimizda hamisha tinchlik va xotirjamlik barqaror bo‘lsin. Ona Vatanimizda asrlar osha mavjud bo‘lgan bag‘rikenglik, turli millat va dinlar vakillari orasidagi o‘zaro hurmat va ehtiromga asoslangan munosabatlar hamisha saqlanib qolishiga tilakdoshman.

Azizlar, ushbu fursatdan foydalanib, men barchangizga Prezidentimizning tez shifo topishlarini istab bildirgan samimiy tilaklar va ezgu niyatlaringiz uchun chin qalbimdan o‘z minnatdorchiligimni izhor etmoqchiman. Bu bizlar uchun juda ahamiyatlidir, nihoyatda samimiy va dildan chiqqan tilaklar va so‘zlar otamning shifo topishlarida yordam bermoqda, deb ishonaman. Sizlarga katta rahmat, azizlar!"