Shaxmat Olimpiadasi, 6-tur. Erkaklar jamoasi Mo‘g‘ulistonga yutqazdi, qizlar jamoasi Sloveniyani yengdi

Ozarbayjon poytaxti Boku shahri mezbonligidagi 42-Butunjahon Shaxmat Olimpiadasida ishtirok etayotgan O‘zbekiston terma jamoasi 6-turda mo‘g‘ulistonlik shaxmatchilarga raqib bo‘lishdi.

Jahonning o‘n yettinchi chempioni Rustam Qosimjonov, shuningdek, Jahongir Vohidov va Anton Filippov raqiblari bilan durang o‘ynab, har biri yarimtadan ochko ishladi. Marat Jumayev esa imkoniyatni boy berib qo‘ydi — 1,5:2,5.

Bungacha 5 tur davomida o‘zbekistonlik shaxmatchilar 3ta turda g‘alaba qozongan, 2ta turda mag‘lub bo‘lgandi.

6-turdan keyin O‘zbekiston erkaklar jamoasi 63-o‘ringa tushib ketdi.

7-tur Nikaragua terma jamoasiga qarshi o‘tkaziladi.

6-tur bellashuvlari o‘zbekistonlik qizlar Sloveniya termasi vakillariga qarshi o‘ynadi.

Bahslar natijasida O‘zbekiston vakillari raqiblarini 2,5ga 1,5 hisobida mag‘lub etdi.

Irina Gevorkyan sloveniyalik raqibasidan yengilgan bo‘lsa, Gulruhbegim Tohirjonova va Sarvinoz Qurbonboyeva zafar quchib, terma jamoaga 1 tadan ochko taqdim etdi. Qolgan yarim ochko Nafisa Mo‘minovaning durangi evaziga qo‘lga kiritildi.

Sloveniya ustidan qozonilgan g‘alaba O‘zbekiston qizlar terma jamoasini 23-o‘rindan 16-pog‘onaga olib chiqdi. O‘ntalikda borayotgan Gruziya O‘zbekiston bilan bir xilda ochko jamg‘argan bo‘lib, qo‘shimcha ko‘rsatkichlarga ko‘ra oldinroq o‘rindan joy olgan.

Bugun — 9 sentabr kuni o‘zbekistonlik qizlar o‘zlari bilan bir xilda ochkosi bor bo‘lgan Germaniyaga qarshi dona suradi. Ortda qolgan 6 ta turning 4 tasida zafar quchgan O‘zbekiston termasi, 1 ta mag‘lubiyat va 1 ta durang qayd etgan.

manba: olamsport.com