O‘zbekiston – kelajagi buyuk davlat!

Ayni damda ko‘plab xorijiy ommaviy axborot vositalarining nigohi O‘zbekistonga qaratilgan. Anglaganingizdek, bu bevosita O‘zbekiston Respublikasining Birinchi Prezidenti Islom Karimovning bevaqt vafoti bilan bog‘liq. Ta'kidlash lozimki, bu inson shu qadar kuchli siyosatchi va davlat arbobi bo‘lganligi bois, u haqidagi ma'lumotlar dunyoning aksariyat yetakchi nashrlarining birinchi sahifasida turibdi. Zero, u kishining vafoti munosabati bilan Kuba Respublikasi hukumati tomonidan 5 sentabrning mamlakatda motam kuni, deb e'lon qilinganligi ham bejizga emas, albatta. 

Haqiqatan ham, Islom Karimov dunyoning obro‘li davlat arboblaridan biri edi. U rahbarlik qilgan davrlarda O‘zbekistonning erishgan yutuqlari haqida ko‘plab kitoblar yozish mumkin. Ushbu buyuk shaxsning yozgan asarlari esa hozirda Yevropaning bir qator universitetlarida talabalar uchun o‘quv-qo‘llanmasi sifatida foydalanilmoqda.

.Ekspertlarning fikricha, Islom Karimov yuritgan oqilona siyosat yildan yilga o‘zining ijobiy tasdig‘ini topmoqda. Hozirgi kunga kelib, O‘zbekiston iqtisodiy jihatdan juda katta rivojlanishga erishdi. Buni mamlakat iqtisodiyotida qayd etilayotgan raqamlardan bilib olish qiyin emas. Mustaqillik yillarida O‘zbekiston iqtisodiyotining izchil rivojlanishiga kichik va xususiy tadbirkorlik hamda turizm kabi sohalarga alohida e'tibor berilganligi sabab bo‘ldi. 
Ayni damda O‘zbekistonda YuNeSKO ro‘yxatiga kiritilgan tarixiy obidalarning yuzdan ortig‘ini uchratishingiz mumkin. Bu esa dunyoning turli chekkalaridan mamlakatimizga sayyohlar oqimining uzluksiz kelishiga sabab bo‘lmoqda. O‘zbekistonning xorijiy sayyohlar e'tiborini tortishiga yana bir sabab, bu mamlakatda tinchlik va barqarorlikning xukmron ekanligidir. 

Bundan tashqari, Islom Karimov o‘z faoliyati davomida madaniyat va sport sohalariga ham jiddiy e'tibor qaratdi. Ayniqsa, bolalar, xotin-qizlar sportini rivojlantirish borasidagi sa'y-harakatlari natijasida aholining kundalik hayotda sog‘lom turmush tarzini kechirishlariga erishildi. Shuningdek, dunyoning ko‘plab mashhur sportchilari xalqaro miqyosdagi tadbirlar va musobaqalar doirasida mamlakatimizga tashrif buyurishdi. Olimpiya o‘yinlari dasturiga kiritilgan sport yo‘nalishlarida ham jaxon chempionatlari bo‘lib o‘tdi. Rojyer Federar, Krishtianu Ronaldu, Lionel Messi kabi sport yulduzlari, Xalqaro Olimpiya Qo‘mitasi prezidenti Tomas Bax va boshqalar Toshkentga tashrif buyurib, respublikamizda sportning jadal suratlarda rivojlanayotganligini alohida ta'kidlab o‘tishdi. 

Ta'kidlash lozimki, kuni kecha bo‘lib o‘tgan O‘zbekiston Respublikasi Oliy Majlisining yuqori va quyi palatalarining qo‘shma yig‘ilishida Senat raisi Nig‘matilla Yo‘ldoshev davlatni vaqtinchalik boshqarish vazifasini ayni damda faqatgina respublika bosh vaziri Shavkat Mirziyoyev muvaffaqiyatli bajara olishini ta'kidlab, uning nomzodini senatorlar va deputatlar ixtiyoriga taklif sifatida kiritdi va u majlis ishtirokchilari tomonidan qo‘llab-quvvatlandi. Zero, joriy yilning 4 dekabr kuni bo‘lib o‘tadigan prezidentlik saylovlarida xalq ishonchini qozona olgan yangi davlat rahbari ham xuddi Islom Karimov yuritgan oqilona siyosatni davom ettiradi. Yangi prezident kim bo‘lishidan qat'iy nazar, O‘zbekiston dunyodagi eng tinch va osoyishta mamlakatlardan biri bo‘lib qolaveradi, mamlakat taraqqiy etishdan to‘xtamaydi.