Kolumbiyada davom etayotgan futzal bo‘yicha Jahon Chempionatida chorak finalning barcha ishtirokchilari nomlari ma'lum bo‘ldi.
Nimchorak final bosqichi doirasida 22 sentabr kuni o‘tkazilgan Ozarboyjon va Tailand terma jamoalari o‘rtasidagi uchrashuv o‘ta shiddatli va gollarga boy bo‘ldi.
O‘yinning asosiy vaqtida 7:7 hisobi bilan yakunlandi. 10 daqiqadan iborat qo‘shimcha bo‘limlar gollarga boyligi bo‘yicha asosiy vaqtdan qolishmadi. Yakunda ozarboyjonliklar 13:8 hisobida g‘alaba qozonishdi.
Ozarboyjon terma jamoasi chorak finalda Portugaliya bilan bahs olib boradi.
Argentina va Ukraina terma jamoalari o‘rtasidagi uchrashuv taqdiri ham qo‘shimcha bo‘limlarda hal bo‘ldi.
Dastlab 40 davom etgan o‘yinning asosiy vaqtida hisob ochilmadi. Qo‘shimcha bo‘limlar tugashiga bir yarim daqiqa qolganida Ukraina darvozasi tomon dabl-penalti beliglandi va undan argentinaliklar samarali foydalanishdi. Yagona gol Argentinaga g‘alaba keltirdi.
Argentinaliklar chorak finalda Italiya-Misr uchrashuvi g‘olibiga qarshi bahs olib borishadi.
Yana bir bellashuvda esa Misr Italiyani yengib, musobaqadan chiqarib yubordi. Bu bellashuvda ham qo‘shimcha bo‘limlar belgilandi.
O‘yin davomida tomonlar hisobda quvlashmachoq o‘ynashdi. Har safar misrliklar hisobda oldinga chiqib olaverishdi, Apennin yarimoroli vakillari esa muvozanatni tiklashga muvaffaq bo‘ldi.
Qo‘shimcha bo‘limda ustunlik Italiya tomonida bo‘ldi, ular bir vaziyatda qulay imkoniyatdan foydalana olishmadi — zarba ustunga tegib qaytdi. Ekstra-taymlar tugashiga 2 daqiqa qolganida italiyalik himoyachining xatosidan misrlik futzalchi unumli foydalandi va jamoasiga g‘alaba keltirgan gol muallifiga aylandi.
Misr terma jamoasi chorak finalda Argentinaga qarshi bahs olib boradi.
