Moliyaviy hisobotni taqdim etish tartibini buzganlik uchun javobgarlik oshiriladi

Deputatlar palataning navbatdagi yalpi majlisi oldidan bir qator qonun va kodekslarga tegishli o‘zgartish va qo‘shimchalar kiritish to‘g‘risidagi qonun loyihalarini ko‘rib chiqishmoqda. 

Xususan, Byudjyet kodeksida ko‘zda tutilgan byudjyet va smeta-shtat intizomini, byudjyet so‘rovi, ro‘yxatdan o‘tkazish uchun xarajatlar smetalari va shtat jadvallarini, shuningdek moliyaviy hisobotni taqdim etish tartibini buzgan hollarda javobgarlikka tortish maqsadida Ma'muriy javobgarlik to‘g‘risidagi hamda Jinoyat kodeksining tegishli moddalariga o‘zgartish va qo‘shimchalar kiritish rejalashtirilgan.

"Mazkur qonunning qabul qilinishi byudjyet va smeta-shtat intizomi buzish huquqbuzarliklarini kvalifikatsiya qilish borasidagi huquqni qo‘llash amaliyotida mavjud qarama-qarshiliklarni bartaraf etishni va bir xilda talqin qilishni, byudjyet to‘g‘risidagi qonun hujjatlarini buzish uchun javobgarlikni tartibga soluvchi to‘liq va yakunlangan qonunchilik hujjatini shakllantirishni ta'minlaydi. Shuningdek, amaliyotdan kelib chiqqan holda bu o‘zgartirishlar Byudjyet kodeksining alohida normalarini Ma'muriy javobgarlik to‘g‘risidagi Kodeks va Jinoyat kodekslarining tegishli normalari o‘rtasidagi tafovutlarni bartaraf etadi", deydi Qonunchilik va sud-huquq masalalari qo‘mitasi a'zosi Avaz O‘rinboyev.

Ushbu qonun loyihasi fraksiyalar muhokamasidan so‘ng, palataning navbatdagi yalpi majlis kun tartibiga kiritiladi.

Manba: parliament.gov.uz