Donald Tramp ayollardan uzr so‘radi

AQSh prezidentligi uchun Respublikachilar partiyasidan nomzod, milliarder Donald Tramp, ayollarning sha'niga yomon so‘zlarni gapirgani uchun uzr so‘ragan videomurojaatini e'lon qildi. 

"Men hech qachon, eng namunali insonman demaganman. Va o‘zimni shunday soxta tutishga urinmaganman ham. Men hozirda afsus qilayotganim ishlarni qilganman va gapirganman. Va bugun havola etilgan o‘n yil avvalgi video ham shunday yomon ishlarimdan biridir. Meni bilganlar, bu so‘zlar hozirgi Trampni aks ettirmasligini yaxshi tushunishadi. Men shularni gapirganman, ular xato bo‘lgan, buning uchun uzr so‘rayman", — degan Tramp.

"Men ahmoqona so‘zlarni gapirib qo‘yganman, ammo gap va amal o‘rtasida katta farq bor. Bill Klinton ayollarni haqorat qilgan, Hillari qo‘rqitgan, hujum qilgan, sharmanda qilgan va o‘z qurbonlariga tahdid qilgan. Biz bularni yaqin kunlarda muhokama qilamiz", — deya qo‘shimcha qilgan siyosatchi. Uning aytishicha, mazkur videoning e'lon qilinishi saylovchilarning e'tiborini muhim masalalardan chalg‘itishdir. 

Avvalroq, Washington Post gazetasi 7 oktabr kuni 2004 yilgi videoni e'lon qilgan edi. Unda Donald Tramp ayollarga tegajog‘liq qilishi bilan maqtanadi. Tramp videoda teleboshlovchi Billi Bush "Hayotimiz kunlari"ning suratga olinishidan avvalroq shu haqda suhbatlashadi.