Muxolifatdagi Suriya ozodlik armiyasi "Frot qalqoni" amaliyoti doirasida o‘tgan kuni IShIDning 14 nafar jangarisini yo‘q qilgan. Yana 17 nafar jangari Turkiya Harbiy havo kuchlari samolyoti bergan aviazarbalar oqibatida yo‘q qilingan. Bu haqda Turkiya Qurolli kuchlari bosh shtabi matbuot xizmati xabar berdi.
"Aktarin va Turkmen Bari aholi turar joy hududlarida SOA jangchilari IShIDga qarshi jang olib bordi. Jang davomida 14 jangari yo‘q qilingan. SOAning yo‘qotishi 2 askar, yana 19 kishi jarohatlandi. Koalitsiyaning samolyotlari uyushtirgan hujum orqali 17 jangari o‘ldirilib, 1 avtomobil va 3 bino yo‘q qilindi", deyilgan xabarda.
Turkiya armiyasi 24 avgust kuni IShIDga qarshi amaliyotlar o‘tkazish maqsadida Suriya shimoliga tanklarini kiritdi. Ilk janglardan keyinroq Jarablus shahri egallandi va shahar nazorati muxolifatdagi kuchlarga topshirildi. Keyinchalik Turkiyaning maqsadi faqat IShIDga qarshi kurash emas, Suriya kurdlarini Frotning g‘arbiy qirg‘oqlaridan surib tashlash ekani ma'lum bo‘ldi.
Turkiya prezidenti Rajab Toyib Erdo‘g‘an Suriya shimolida qochqinlar uchun xavfsiz hudud yaratilishi uchun 5 ming kv km maydonni jangarilardan tozalash zarurligi haqida gapirgan.
