Islandiyada navbatdan tashqari parlament saylovlari bo‘lib o‘tadi

29 oktabr kuni Islandiya altingi uchun navbatdan tashqari saylovlar bo‘lib o‘tadi. Saylov uchastkalari mahalliy vaqt bilan soat 10:00dan 22:00gacha ochiq bo‘ladi. Islandiya parlamenti dunyodagi eng qadimgi parlamentlardan biri hisoblanadi. 

Saylovlar mamlakatga "Panama hujjatlari" e'lon qilingach, vujudga kelgan siyosiy inqirozdan chiqishga yordam berishi kerak. Bu safargi saylovlarning e'tiborli tomoni, bahorgi noroziliklardan so‘ng Qaroqchilik partiyasining obro‘si ortib ketganidir. 

Saylovlarda ovoz berish huquqiga 245 ming kishi ega. 63ta deputatlik kursisiga 12 partiyadan 1,5 mingga yaqin nomzod kurashmoqda. Mahalliy OAVning yozishicha, saylovlarda saylovchilarning 0,6 foizi bevosita nomzod sifatida qatnashmoqda. 

Aslida, Islandiya parlament saylovlari 2017 yil may oyida bo‘lib o‘tishi kerak edi. Navbatdan tashqari saylovlarga, moliyaviy inqiroz va ofshor mablag‘lariga qarshi noroziliklardan so‘ng hukumat tepasiga kelgan Rivojlanish partiyasi yetakchisi Sigmyundyur David Gyunnleygsonning “Panama hujjatlari”ga aloqador bo‘lib qolgani sabab bo‘ldi. Britaniya Virjin orollarida uning rafiqasi nomida ofshor kompaniyalari ro‘yxatdan o‘tgani fosh etilgan edi. Shundan so‘ng, 7 aprelda Gyunnleygsonn iste'foga chiqishga majbur bo‘ldi. 

Bu safargi saylovlarning yana bir shov-shuvli jihati Qaroqchilik partiyasining saylovchilar orasida obro‘si oshib ketganligidir. O‘tgan gal u 5,1 foiz ovoz to‘plab, parlamentda 3 nafar a'zosiga ega bo‘lgandi. Biroq, hozirda, ijtimoiy so‘rov natijalariga ko‘ra, partiya 20-30 foiz ovoz to‘plashi mumkinligini ko‘rsatmoqda. Boshqa bironta partiya aksar ko‘pchilik ovozni olish imkoniga ega emasligi e'tiborga olinsa, Islandiyani yaqinda “qaroqchilar” boshqarishi mumkinligi oydinlashadi. 

Qaroqchilar partiyasi 2012 yilda mahalliy faollar, xakerlar, ilm-fan sohasi vakillari va "ijodkor toifa" tomonidan Shvetsiyadagi shunday partiyadan namuna olingan holda tashkil etilgan edi. Biroq, boshqa mamlakatlardagi safdoshlaridan farqli ravishda, islandiyalik siyosatchi "qaroqchilar" katta siyosatga kirishning uddasidan chiqishdi.