“O‘zbekiston havo yo‘llari” o‘tgan 9 oyda amalga oshirgan ishlariga yakun yasadi

“O‘zbekiston havo yo‘llari” milliy aviakompaniyasi 2016 yil yanvar-sentabr oylarida amalga oshirgan ishlari va ko‘rsatilgan xizmatlariga doir hisobotini e'lon qildi. Unga ko‘ra, o‘tgan 9 oy mobaynida 16692 ta reys amalga oshirilgan hamda 1,882 mln kishi manziliga yetkazilgan. Bu o‘tgan yilning shu davriga nisbatan 5 foizga kamdir, deya xabar qilingan kompaniya saytida. 

Hisobotda yozilishicha, uzoq xorij yo‘nalishlari bo‘ylab yo‘lovchilarni tashish hajmi 0,8 foizga oshgan, yaqin xorijiy mamlakatlar va mamlakat ichida yo‘lovchilarni tashish ko‘rsatkichi tegishli ravishda 4,2 va 14,4 foizga qisqargan. Bir reys hissasiga o‘rtacha 113 yo‘lovchi to‘g‘ri kelgan. 

Miliy aviakompaniya yuk samolyotlari jami 734ta reysni amalga oshirgan, bu esa o‘tgan yilning shu davriga nisbatan 46ta parvozga ko‘p demakdir. Biroq, ularda o‘tgan yilgi ko‘rsatkichdan 1,6 foiz kam, ya'ni 30,6 ming tonna yuk tashilgan. Xalqaro intermodal logistika markazi joylashgan «Navoiy» aeroportidan 27 ming tonna yuk olib ketilgan.