Tramp Pensilvaniyada Klintondan o‘zib ketdi

AQSh prezidentligi uchun Respublikachilar nomzodi Donald Tramp kutilmaganda odatda demokratlarga yonbosuvchi Pensilvaniya shtatida raqibi Hillari Klintondan o‘zib ketdi. 

AQSh mahalliy saylov qo‘mitasi ma'lumotlariga ko‘ra, 98 foizdan ortiq ovoz byulletenlari sanalganidan keyin ma'lum bo‘lishicha, Trampga 48,7 foiz saylovchi ovoz bergan, Klintonga – 47,74 foiz fuqaro ishonch bildirgan.

Agar Tramp Pensilvaniyada g‘alaba qozongudek bo‘lsa, bu avvalgi g‘alabalari bilan birga prezidentlik saylovida g‘olib chiqishiga hissa qo‘shadi. 

20 nafar saylovchini taqdim etuvchi Pensilvaniya shtati saylov natijalariga sezilarli ta'sir ko‘rsata oladigan bir necha shtatlardan biri hisoblanadi. Ta'kidlanishicha, Tramp uchun bu shtatda g‘alaba qozonishi suv va havodek zarur edi. Garchi nomzodlarning Pensilvaniyadagi kurashi doimo keskin ruhda o‘tganiga qaramay, shtat 1992 yildan beri Demokratik partiya nomzodini qo‘llab-quvvatlab keladi. AQSh shimoli-sharqidagi shtatda 12,7 million kishi istiqomat qiladi. Filadelfiya va Pittsburg shtatning yirik shaharlaridir.