Qirg‘iziston prezidenti bugun Samarqandda O‘zbekiston rahbari bilan uchrashadi

Qirg‘iziston prezidenti Almazbek Atambayev O‘zbekistonga tashrifi davomida mamlakat Prezidenti Shavkat Mirziyoyev bilan uchrashib, Islom Karimov qabrini ziyorat qiladi. U Samarqand shahriga bugun kelmoqda, deb xabar beradi RIA Novosti qirg‘iz davlat rahbari ma'muriyati vakiliga asosan.

“Almazbek Atambayevning O‘zbekistonga 24 dekabr kuniga mo‘ljallangan ishchi tashrifi doirasida Prezident Shavkat Mirziyoyev bilan uchrashuv o‘tkaziladi. Unda davlat rahbarlari bir qator ikki tomonlama masalalarni muhokama etishadi”, - deya aytib o‘tdi agentlik suhbatdoshi.

Qirg‘iziston rahbari devonining tashqi siyosat bo‘limi boshlig‘i Sapar Isoqovning ma'lum qilishicha, Atambayev Shavkat Mirziyoyev tomonidan Prezident sifatida qabul qilinadigan birinchi xorij davlat yetakchisi bo‘ladi.

Eslatib o‘tamiz, joriy yilning oktabr oyida Qirg‘iziston bosh vaziri birinchi o‘rinbosari Muhammadqalim Abulg‘oziyev boshchiligidagi hukumat delegatsiyasi O‘zbekistonning Andijon shahriga kelgandi. Keyinroq esa O‘zbekiston bosh vaziri o‘rinbosari Adham Ikromov boshchiligidagi delegatsiya ham ushbu davlatga tashrif buyurdi.