AQShda 1884 yilda asos solingan sirk yopiladigan bo‘ldi

AQShda yuz yildan ziyod vaqt davomida faoliyat yuritib kelayotgan eng qadimiy The Ringling Bros. and Barnum & Bailey sirki 2017 yilning may oyida o‘zining so‘nggi tomoshasini ommaga havola etadigan bo‘ldi. Sabab - chiptalar sotuvining tushib ketishi va katta xarajatlar. Bu haqida 14 yanvar, shanba kuni sirk egasi hisoblanuvchi Feld Entertainment kompaniyasi rahbari Kennet Feld bergan xabarga asoslanib, TASS agentligi ma'lum qildi. 

"Uzoq o‘y-fikrlar va hisob-kitoblardan so‘ng men va mening oilam shu yilning may oyida eng oxirgi tomoshani qo‘yishga qaror qildik. The Ringling Bros. chiptalari sotuvi pasaymoqda, biroq bu tendensiya sirk fillarining qarishi natijasida yanada murakkablashadi. Katta xarajatlarni ham inobatga oladigan bo‘lsak, sirkning bundan keyingi faoliyati nochor biznesga aylanadi", - deya izohladi 1967 yildan buyon The Ringling Bros. and Barnum & Bailey'ga egalik qiluvchi oila a'zosi Feld.

Kompaniya rahbari sirkning sodiq muxlislariga o‘z minnatdorchiligini bildirdi. So‘nggi shou 7 va 21 may kunlari Rod-Aylend va Nyu-York shtatlarida bo‘lib o‘tadi. 

Jonivorlar huquq himoyachilari uzoq yillar davomida The Ringling Bros. and Barnum & Bailey sohiblari bilan kurash olib borishdi. Tsirk egalari 2011 yilda tinchlik shartnomasi asosida 270 ming dollar miqdorida jarima to‘lashdi. Feld Entertainment jonivorlar bilan shafqatsiz munosabatda bo‘lganini tan olmagan, lekin hayvon o‘rgatuvchilarning professional tayyorgarligiga kerakli o‘zgarishlarni kiritishga va'da bergan.

Tsirk 1884 yilda Viskonsin shtatida ochilgan. O‘rgatilgan fillar shousi truppaning "tashrif qog‘ozi"ga aylangan.