IShID terrorchilik guruhi faoliyati giyohvand moddalar ishlab chiqarish va sotishdan tushadigan mablag‘larga ko‘p jihatdan bog‘liq. Bu haqda Rossiya tashqi ishlar vaziri Sergey Lavrov Xalqaro giyohvandlikka qarshi forumda chiqish qilib aytib o‘tgan.
"Giyohvand moddalar birinchi navbatda xalqaro xavfsizlikka tahdidlar bilan to‘g‘ridan-to‘g‘ri bog‘liq. Bu bizning davlatga ham rahna solmoqda, - dedi u. – Men aynan giyohvand moddalar biznesi, bu soha terrorchilik tashkilotlari va uyushgan jinoyatchilikni moliyalashtirayotganini nazarda tutmoqdaman".
"Afg‘oniston bizga yaqin yerda joylashgan. Ushbu mamlakatdagi tolibonlar va boshqa muxolif guruhlar nazoratida bo‘lgan hududlarda giyohvand moddalar ishlab chiqarilishi hajmi doimiy ravishda oshirib borilmoqda. IShID Suriya, Iroq va boshqa davlatlarda neft kontrabandasidan tashqari, giyohvand moddalarni ishlab chiqarish tufayli ham faoliyat olib boradi".
Lavrovning ma'lum qilishicha, Rossiya jahon arenasida giyohvand moddalarga aloqador liberal konsepsiyalarning ilgari surish harakatlariga qarshi chiqadi.
"Giyohvand moddalar global muammoga aylandi. O‘tgan yilning aprel oyida BMT maxsus sesssiyasi bo‘lib o‘tdi. U jahondagi giyohvand moddalar muammosiga bag‘ishlandi hamda yakuniy hujjatlarda bu global xavf bilan to‘xtovsiz kurash olib borishni davom ettirish bo‘yicha bizning prinsipial pozitsiyamizni o‘zida ifodalaydi", - ta'kidlab o‘tdi vazir.
"Bizning maqsad – bu giyohvand moddalardan erkin bo‘lgan dunyodir", - qo‘shimcha qilgan Lavrov.
