Tramp Klintonni olqishlashni tashkil etdi

AQSh prezidenti Donald Tramp lavozimiga kirishish munosabati bilan tashkil etilgan tantanali tushlik vaqtida saylovlardagi raqibi Hillari Klintonni olqishlashni tashkillashtirdi. Bu haqda Mediaite xabar qilmoqda. Sobiq davlat kotibi tantanaga tashrif buyurgan va ular qo‘l berib ko‘rishishdi. Tushlikdan so‘ng, Tramp mikrofon yoniga borib, to‘planganlarga murojaat qildi.

«Preziden Bill Klinton va davlat kotibi Hillari Klinton tashrif buyurishlari bilan meni ikrom qilishdi», — dedi Tramp. Shundan so‘ng, zalda qarsaklar ovozi eshitildi, yangi davlat rahbari esa, bu bilan ham qoniqmay, barcha mehmonlarni tik turib olqishlashga chorladi.

Trampning o‘zi ham birmuncha vaqt olqishlab, qarsaklar ovozi tinganda shunday dedi: «Boshqa gapga hojat yo‘q, chunki men bu ikki insonni juda ham hurmat qilaman».

Hillari Klinton, o‘z navbatida, buning uchun minnatdorlik izhor qildi. «Men bugun demokratiyamiz va qadriyatlarimizga hurmat ko‘rsatish maqsadida bu yerdaman. Men hech qachon, mamlakatimiz va uning kelajagiga ishonishdan to‘xtamayman», — deb yozgan Klinton xonim Twitter mikroblogida.