Qozog‘istonda o‘zbek avtomobillari yig‘iladi

Qozog‘istonning Kostanay viloyatida 2017 yilda 10 ming dona yengil avtomobillarni yig‘ish rejalashtirilgan. Bunga xitoylik va o‘zbekistonlik investorlar bilan hamkorlik qilish evaziga erishish rejalashtirilgan, deb xabar qilmoqda alau.kz sayti. 

«Kostanay viloyatida «O‘zavto» bilan birga yengil va yuk avtomobillarini yirik uzelli yig‘ishni yo‘lga qo‘yish rejalashtirilgan. Bu milliy avtomobilsozlikda yetakchi o‘rinlarni saqlab qolishda sezilarli hissa qo‘shadi. Mahalliylashtirishni 50 foizga yetkazish maqsadida, 2016 yilda sanoat hududini barpo etish boshlandi», — degan Kostanay viloyati hokimi o‘rinbosari Roza Kamalova.

Kostanay viloyati hokimi Arximed Muxambetovning so‘zlariga ko‘ra, o‘zbekistonlik hamkorlar bilan qo‘shma loyihalarni amalga oshirishga katta umid bilan qaralmoqda. Erishilgan kelishuvga ko‘ra, Kostanay korxonalarida uncha qimmat bo‘lmagan avtomobillarni yig‘ish ko‘zda tutilgan. 

«RAVON modellari o‘rtacha 2 million 600 ming — 2 million 700 ming tenge(7500-8000 AQSh dollari) atrofida bo‘ladi. Bugungi kunda mamlakatdagi eng arzon «LADA Priora» 3,5 million tenge (10500 dollar)dir. Farq ko‘rinib turibdi, RAVON 900 ming tenge arzon bo‘ladi. Sifati juda yaxshi. Hozircha, yiliga 7 ming dona yig‘ish bo‘yicha O‘zbekiston bilan kelishib oldik. Albatta, hozircha, yirik uzelli, keyinchalik, mayda uzelli usulda yig‘ishni niyat qilayapmiz», – deya xulosa qilgan viloyat rahbari. 

Rasmiy ma'lumotlarga ko‘ra, 2017 yilda Qozog‘istonning Kostanay viloyati 10 000 dona avtomobilni yig‘adi.