Mogadishodagi mehmonxonaga hujum qurbonlari soni 28 kishigacha yetdi

"Ash-Shabob" guruhi jangarilarining Somali poytaxti Mogadishodagi mehmonxonaga uyushtirgan hujumi oqibatida halok bo‘lganlar soni 28 kishigacha yetdi, deb xabar berdi "Frans Press" axborot agentligi.

Avvalroq 14 kishi halok bo‘lgani ma'lum qilingandi. 25 yanvar ertalab Dayah mexmonxonasi eshigiga minalashtirilgan avtomobil kelib urilgan. Birinchi portlashdan so‘ng ikkinchi portlash yuz bergan. So‘ngra ichkariga jangarilar bostirib kirgan va otishma boshlangan.

Ma'lum qilinishicha, yana 43 kishi jarohat olgan.  

Dayah mehmonxonasi Somali parlamenti binosi yaqinida joylashgan. Unda ko‘pincha siyosatchilar, hokimiyat organlari vakillari va tadbirkorlar to‘xtaydilar.