Eron prezidenti Tramp haqida: hozir devorlar quradigan vaqt emas

Eron prezidenti Hasan Ruhoniy AQSh rahbari Donald Trampning qochqinlar va Meksika bilan chegarada devor qurish haqidagi farmonlariga o‘z fikrini bildirdi. U “hozir devorlar quradigan vaqt emasligini” aytib o‘tgan, deb xabar berdi Tasnim nashri.

“Bugun millatlarimiz o‘rtasida devor qurish uchun qulay vaqt emas. Nima, ular ko‘p yillar muqaddam Berlin devori qanday qilib qulaganidan bexabarmilar?”, - dedi u.

Ruhoniyning ta'kidlashicha, “millatlar o‘rtasida devorlar bo‘lsa ham, ularni olib tashlash kerak”.

Eron prezidenti so‘zlariga ko‘ra, ayni damda barchamiz madaniyat, ilm-fan va boshqa bir qator sohalarda qo‘shniga aylanganmiz. Texnologiyalar esa bizga turli mamlakatlar o‘rtasidagi juda ham yirik masofalarni tezlik bilan bartaraf etish imkonini bergan.

“Bugun hech kim globallashuv jarayoniga qarshi chiqa olmaydi”, - deb ta'kidladi Ruhoniy.

Avvalroq Tramp Meksika bilan chegarada devor qurish haqidagi farmonga imzo chekkandi. Uning so‘zlariga ko‘ra, u Meksikadan olib kirilayotgan import mahsulotlariga qo‘shimcha soliq kiritishi mumkin. Bu devor qurilishiga sarflangan mablag‘lar o‘rnini qoplash maqsadida amalga oshirilishi ehtimolga yaqin.