OAV: Madrid hokimi Trampni Gitler bilan taqqosladi

Ispaniya poytaxti Madrid shahri hokimi Manuela Karmena AQSh prezidenti Donald Trampni Adolf Gitler bilan taqqosladi. Bu haqda ABC gazetasi xabar berdi.

Uning ma'lumotiga ko‘ra, shahar rahbari Oq uy yetakchisini AQShdagi muhojirlik siyosatini kuchaytiruvchi so‘nggi qarorlari sabab tanqid qildi. “Biz bu qonuniy yo‘l bilan tayinlangan hukumat ekanligini hamda uni fuqarolarning aksariyat qismi qo‘llab-quvvatlashini bilamiz. Biroq XXI asrda inson huquqlarini juda ham qo‘pol ravishda buzayotganliklari guvohiga aylanmoqdamiz. Bu holat avval ham qo‘llab-quvvatlashgan bir hukumatdagi kabi takrorlanmoqda”, - degan Karmena hokimiyatdagi yig‘ilish avvalida.

ABC Karmena Trampni Gitler bilan taqqoslagani borasida aniq iqtiboslarni keltirmadi. Biroq bunday o‘xshatish haqiqatdan ham bo‘lganini boshqa Ispaniya OAV: EFE axborot agentligi, El Pais gazetasi ham tasdiqladi.

Shahar hokimi so‘zlaridan so‘ng “Fuqarolar” partiyasi va Ispaniya ishchilar sotsialistik partiyasi vakillari qarsak chalishgan bo‘lsa, Xalq partiyasi vakilasi Esperansa Agirre Karmena fikrlari bilan qo‘shilmasligini ma'lum qilib, Amerika rahbariyati qarorlari “yoqish yoki yoqmasligi mumkin” deb ta'kidlab o‘tgan. Agirre “dunyodagi eng yomon totalitarizm tug‘ilgan Yevropadan demokratiya darslarini” bermaslikka chaqirdi.

Avvalroq Tramp “Mamlakatning xorijiy terrorchilar kirib kelishidan himoyasi to‘g‘risida”gi farmoni bilan mamlakatga 90 kun davomida Eron, Iroq, Yaman, Liviya, Suriya, Somali va Sudan fuqarolari kirib kelishini taqiqlab qo‘ydi. Hujjat shuningdek barcha qochqinlarni qabul qilishni 120 kunga to‘xtatib turish hamda Suriyalik qochqinlarni qabul qilishni noma'lum muddatga qoldirishni ham nazarda tutadi.