Asad: Suriya mening oilamga tegishli emas

Suriya prezidenti Bashar Asad uning oilasi hokimiyatni boshqarmaydigan holat bo‘lishi mumkinligini inkor etmayapti. Uning fikricha, Suriya davlati barcha suriyaliklarga tegishli bo‘lgani sababli Bashar Asad o‘rnida har qanday suriyalik bo‘lishi mumkin. 

"Albatta, mamlakat mening oilamga tegishli emas. Suriya suriyaliklarga tegishli va har bir suriyalik ushbu lavozimni (prezident) egallash huquqiga ega", — degan Suriya arab respublikasi rahbari Bashar Asad, jurnalistning savoliga javob berar ekan. 

Asadning Belgiya OAV vakillari bilan intervyusini SANA agentligi e'lon qildi.

Suriyaning hozirgi prezidenti Bashar Asad 1965 yil 11 sentabrda Suriya harbiy-havo kuchlari qo‘mondoni va havo hujumiga qarshi brigada generali Hafiz Asad oilasida dunyoga kelgan. Hafiz Asad 1970 yilda davlat rahbari bo‘lgan edi. 

Otasining vafotidan so‘ng, 2000 yil 11 iyunda Bashar Asadga general-leytenant unvoni berilgan hamda Suriya armiyasining oliy bosh qo‘mondoni lavozimini egallagan edi. O‘sha yili hukmron Baas partiyasining s'yezdida partiya bosh kotibligiga saylangan hamda prezidentlikka yagona nomzod sifatida ilgar surilgandi. Mamlakat parlamenti Bashar Asadni prezidentlikka saylagan edi.