AQSh yadro qurolini qo‘llash doktrinasini qayta ko‘rib chiqadi

AQSh yadro qurolini qo‘llash doktrinasini bahorda ko‘rib chiqadi. Bu haqda Amerika harbiy-havo kuchlari shtab boshlig‘i general Devid Goldfin ma'lum qildi, deb xabar qilmoqda TASS agentligi.

«Men bahorda yadro doktrinamiz qayta ko‘rib chiqilishini kutayapman. Men haqiqatan ham buni sabrsizlik bilan kutmoqdaman, chunki har qanday yangi ma'muriyatda bo‘lgani kabi yadro komplekslarimizga yangicha qarash vaqti keldi, deb hisoblayman», — degan general. 

Goldfinning so‘zlariga ko‘ra, bu AQSh mudofaa vazirligi «ma'muriyat ularni qaysi tomonga yo‘llamoqchi bo‘layotgani»ni tushunishi uchun zarurdir. Ta'kidlanishicha, doktrinaning hozirgi tahriri sobiq prezident Barak Obama davrida qabul qilingan edi. 

Amerika generalining umid bildirishicha, ma'muriyat nafaqat yadro kallaklarini yetkazib berish vositalari, balki kallaklar soni va ularning quvvatiga doir munozaralarni ham o‘tkazadi. 

Avvalroq, AQSh va Pentagon razvedka xizmatlari Rossiya va Xitoyning yadro zarbalariga qanchalik chiday olish qobiliyatini baholashi haqida xabarlar paydo bo‘lgan edi.