Dunyodagi eng yirik mis konida ish tashlash o‘tkaziladi

Chili shimolida joylashgan “Eskondida” mis koni ishchilari payshanba kuni ish tashlashni boshlashmoqda. Bu haqda shaxta ishchilari kasaba uyushmasi seshanba kuni kechqurun xabar berdi.

"Vositachilar ishtirokidagi muzokaralarda kelishuvga erishilmadi. Hamma ish tashlashga", - deyiladi 2,5 ming kishini birlashtiruvchi "Eskondida" koni kasaba uyushmasi ittifoqi xabarida. Uning qachongacha davom etishi noma'lum. Ish tashlash 9 fevral kuni mahalliy vaqt bilan 8:00da boshlanadi.

Ishchilarning so‘zlariga ko‘ra, "muzokaralarda kelishuvga kelmaslik" konni nazorat qiluvchi BHP Billiton kompaniyasi aybi bilan yuz berdi. Kasaba uyushmasi turli imtiyoz va bonuslarni taqsimlashda kompaniya xodimlarni eski va yangilarga bo‘lmaslikni talab qilmoqda. Bundan tashqari, ishchilar oylik ish haqlarini 7 foizga oshirish va ulardan har biriga 38,6 ming dollardan pul to‘lashni so‘rashgan. BHP Billiton ilgari surilgan talablarga rozi bo‘lmay, 12 ming dollar miqdoridagi bonusni taklif qildi.

"Eskondida" koni korporativ masalalar bo‘yicha vitse-prezidenti Patrisio Vilaplanning xabar berishicha, kompaniya ish tashlash vaqtida mis qazib olishni to‘xtatmoqchi, sababi "operator va mutaxassislarning ish tashlashi tufayli ishchilar xavfsizligini kafolatlovchi sharoitlar yaratilmaydi". 

Ma'lumot uchun, "Eskondida" dunyoda mis qazib olish hajmi bo‘yicha eng yirik kon hisoblanadi. Chili tog‘-kon kengashi ma'lumotiga ko‘ra, dunyoda qazib olinadigan bu metallning taxminan 6 foizi aynan shu shaxtaga tegishli. 2015 yilda konda 1,2 million tonna mis qazib olindi.