Eronga 2017 yilning yozida 2 milliard dollar investitsiya kiritilishi mumkin

Fransiyaning Total neftgaz kompaniya rahbari Patrik Puyanne Eronga 2 milliard dollar investitsiya kiritish bo‘yicha yakuniy qarorni qabul qilishga tayyor ekanini ma'lum qildi. Mablag‘lar joriy yilning yoz oylarida mamlakatda joylashgan dunyodagi eng yirik Janubiy Pors gaz konini rivojlantirishga yo‘naltirilishi mumkin. Bu haqda Reuters xabar berdi.

Biroq Puyannening aniqlik kiritishicha, Eronga AQSh tomonidan yangi sanksiyalar kiritilsa, kompaniya o‘z investitsiyalardan voz kechadi.

«Biz Eron bilan yadro kelishuvi bo‘yicha bitimni nazarda tutgan holda gaz loyihasiga shartnoma imzolaymiz. Biroq agarda sanksiyalar yana tiklansa, bu mamlakat bilan ishlay olmaymiz», - deya aytib o‘tdi kompaniya rahbari.

Avvalroq Total Braziliyadagi konlarni rivojlantirishga 2,2 milliard AQSh dollari yo‘naltirmoqchi ekani xabar qilingandi.