Avstriyada Hitlerga o‘xshash bo‘lgan yigit hibsga olindi

Adolf Hitler tug‘ilgan shahar Braunau-am-Innda politsiya unga juda ham o‘xshab ketuvchi shaxsni hibsga oldi. Bu haqda The Local xabar bermoqda.

Avstriyaning 25 yoshli fuqarosi o‘z xonadonida qo‘lga olingan hamda bu jarayonda qarshilik ko‘rsatmagan.

U natsistlar mafkurasini sharaflagani uchun hibsga olindi.

Avvalroq Hitlerga o‘xshash bo‘lgan shaxsni kitoblar do‘konida - Ikkinchi jahon urushi haqidagi jurnalni o‘qib o‘tirganini ko‘rishgani haqida xabarlar tarqalgandi.

Shuningdek mahalliy aholi vakillari yigitni Adolf Hitler tug‘ilgan uy yonida ko‘p bora uchratishgan va u o‘zini Xarald Hitler deb tanishtirgan.