Kreml noyabr oyida Rossiya – AQSH – Ukraina formatidagi uch tomonlama muzokaralarni tiklashga tayyor. Bu haqda RF prezidenti yordamchisi Yuriy Ushakov Vladimir Putin va Stiv Uitkoff oʻrtasida 21-oktabr kuni Peterburgda boʻlib oʻtgan uchrashuvdan keyin maʼlum qildi.
«Prezident Stiv Uitkoffga yuqorida tilga olingan uch tomonlama muzokaralarni noyabr oyining oʻninchi kunlarida, asosiy mavzu boʻyicha qaytadan boshlashga tayyor ekanimizni maʼlum qildi. Bu mavzu mojaro tugaganidan keyin Rossiya va Ukraina uchun xavfsizlik tizimini yaratish bilan bogʻliq», – dedi Ushakov jurnalistlarga.
Uning soʻzlariga koʻra, Uitkoff uchrashuvda taklifni qoʻllab-quvvatlagan va «bunday qaror prezident Tramp tomonidan katta mamnuniyat bilan qarshilanishiga shubha yoʻqligi»ni aytgan. AQSH prezidenti elchisining oʻzi hozircha Peterburgdagi uchrashuv yakunlari boʻyicha izoh bermadi.
Shu bilan birga, Ushakov Uitkoff Putin bilan uchrashuvda Yevropa Ittifoqi va Kiyevning «yangi yondashuvlari» haqida gapirgani, biroq «ularda Ukraina inqirozini hal qilish nuqtayi nazaridan foydali narsalar unchalik koʻp boʻlmagani»ni qoʻshimcha qilgan.
«Bilmadim, biz qanchalik yaqinmiz, ammo ish shunga qarab bormoqda», – degan Rossiya prezidenti yordamchisi «Vesti» muxbirining mojaroni yakunlash istiqbollari haqidagi savoliga javoban.
U shuningdek Rossiya, AQSH va Ukraina vakillarining keyingi uch tomonlama uchrashuvi Abu-Dabida boʻlib oʻtishi mumkinligini aytgan.
«Biz Abu-Dabini moʻljallayapmiz. Noyabrning oʻrtalarida, noyabrning oʻninchi kunlariga kelishilgan», – degan u.
Bundan tashqari, Ushakov Vladimir Putin, Donald Tramp va Si Jinping oʻrtasida APEC sammiti doirasida uch tomonlama uchrashuv oʻtkazilishi mumkinligi yuzasidan munosabat bildirib, bu tarixiy voqea boʻlishini aytgan.
Ushakovning soʻzlariga koʻra, Moskva sentabr oyida, Davlat dumasiga saylovlardan soʻng darhol uch tomonlama muzokaralarni qayta tiklashni rejalashtirgandi, ammo Kiyevning aybi bilan bu amalga oshmagan – «ovoz berish kunlarida Moskva va boshqa shaharlar, jumladan, saylov uchastkalariga juda katta zarbalar» berilgani tufayli.
Kiyev hozircha Kremlning taklifi yuzasidan munosabat bildirmadi.
Putin va Uitkoffning uchrashuvi Strelna posyolkasidagi Konstantin saroyida, yopiq eshiklar ortida boʻlib oʻtdi. Unda Rossiya prezidentining xorijiy mamlakatlar bilan investitsiyaviy-iqtisodiy hamkorlik boʻyicha maxsus vakili Kirill Dmitriyev ham ishtirok etdi. U chorshanba kuni ertalab Uitkoffni Pulkovo aeroportida kutib oldi va uchrashuvdan soʻng uni kuzatib qoʻydi.
