Malayziyada Kim Chen Inning akasi o‘ldirildi

KXDR rahbari Kim Chen Inning akasi Kim Chon Nam Malayziyada suiqasd qurboni bo‘lgan. Bu haqda Janubiy Koreyadagi Yonhap agentligi xabar tarqatdi.

Agentlik ma'lumotiga ko‘ra, Kim Chon Namga Kuala-Lumpur shahri aeroportida zaharli igna bilan qurollangan ikki ayol hujum qilgan.

Agentlik politsiyaga asoslanib xabar berishicha, shimoliy koreyaliklar yetakchisining akasi Kuala-Lumpurda KXDR maxsus xizmatlari vakillari tomonidan yo‘q qilingan, ya'ni ushbu qotillik ortida KXDR hukumati turibdi. Qotillikni sodir etganlar voqea joyidan yashirinishgan.

Malayziya politsiyasi Reuters agentligiga aeroportdan shifoxonaga ketishda bir kishi jon berganini tasdiqlagan. Xavfsizlik xizmati xodimlari hozircha marhumning shaxsini tasdiqlashmagan.

«Vikipediya» ma'lumotiga ko‘ra, 1971 yilning 10 mayida tug‘ilgan Kim Chon Nam KXDRning avvalgi rahbari Kim Chen Irning nikohsiz tug‘ilgan katta o‘g‘li edi. Uning onasi aktrisa Son Xe Rim. U davlat rahbari merosxo‘ri sifatida qaralmagan, ammo u ma'lum vaqt hukumatda yuqori lavozimni egallab turgan. 2001 yilda u Yaponiyaga Dominikanning soxta pasporti orqali kirishga harakat qilganida qo‘lga olingan va bundan ikki davlat munosabatlarida taranglik yuzaga kelgan, oqibatda u otasining g‘azabiga uchragan. 2011 yilda Kim Chen Irning vafotidan keyin, yangi hukumat Kim Chon Namning amakisini qatl qildi, shundan so‘ng u mamlakatdan chiqib ketgan va vatanga qaytib kelmagan.

2014 yilda uni Kuala-Lumpurdagi restoranlardan birida ko‘rib qolishgandi.