“Aykel-Manas” Farg‘onada

Zahiriddin Muhammad Bobur nomidagi O‘sh Davlat Akademik o‘zbek drama teatri Farg‘ona vodiysi bo‘ylab gastrollarini davom ettirmoqda. Bugun u Farg‘ona shahridagi O‘zbekiston Respublikasining birinchi prezidenti Islom Karimov nomidagi muhtasham teatr-konsert saroyida Qirg‘iziston xalq shoiri, dramaturg Jalil Sadikovning “Aykel Manas” spektaklini katta muvaffaqiyat bilan namoyish etdi. Qirg‘izistonlik san'atkorlarning Farg‘ona vodiysi viloyatlariga ijodiy safari bejiz emasdi. Bugun Farg‘ona vodiysida 300 mingga yaqin qirg‘iz millatiga mansub aholi to‘laqonli O‘zbekiston fuqarosi sifatida tinch va xotirjam yashamoqda. Ularning diniy va milliy urf-odatlari, an'ana va qadriyatlarini rivojlantirish, qo‘llab-quvvatlash uchun barcha imkoniyatlar yaratilgan. Qolaversa O‘zbekiston Prezidenti Shavkat Mirziyoyev Qirg‘iziston Prezidenti Almazbek Atambayev bilan bo‘lgan Samarqanddagi uchrashuvida madaniyat, san'at, jamoat tashkilotlarining to‘g‘ridan-to‘g‘ri aloqalarini yanada mustahkamlash muhimligini alohida ta'kidlagan edilar. Aslida bu do‘stlik poydevori ilgaridan qo‘yilgan. Bundan 22 yil avval O‘zbekiston Respublikasining Birinchi Prezidenti Islom Karimov Bishkekda o‘tkazilgan “Manas” eposining 1000 yillik tantanalarida ikki xalq o‘rtasidagi do‘stlik to‘g‘risida shunday degan edi:

- “Biz, o‘zbeklar, bugun “Manas” eposining to‘yida qatnashar ekanmiz, bir narsadan chinakam iftixor qilishga haqqimiz bor. Qani aytinglar! Qirg‘iz xalqining ulug‘ o‘g‘loni Manasning suyukli umr yo‘ldoshi, yelkadoshi, tog‘u tayanchi kim bo‘lgan? Uning maslakdoshi, dostonda aytilganidek, eng qiyin kunlarida, umrining oxirigacha sadoqatli safdoshi kim bo‘lgan? Biz, o‘zbeklar, katta g‘urur bilan, faxr bilan aytamiz-ki, bu ayol Buxoro xonining suyukli qizi Xonikey bo‘lgan. Shundan keyin, azizlarim, o‘zbek va qirg‘izning qardoshligiga yana qanday dalil kerak? Yana qanday isbot kerak?”

- Yuz yillar osha o‘z ota-bobolarining qutlug‘ merosini ko‘z qorachig‘iday asrab-avaylab kelayotgan, qardosh-jondosh qirg‘iz do‘stlarimizning bu boradagi ishlari, mana shunday tarixiy asarni bizning viloyatimizda namoyish etib, xalqimizning chuqur hurmat va e'tiboriga sazovor bo‘lgani barchamizni xursand qiladi, - deydi Yusufjonqiziq Shakarjonov nomli Farg‘ona Davlat drama teatri aktyori Muhammadsoli Ahmedov. - Shuning uchun xam bu dostonni yaratgan va unga asrlar davomida sayqal berib kelgan qirg‘iz xalqining badiiy zakovatiga, noyob iste'dodli manaschi oqinlarga o‘z ehtiromimizni, hurmatimizni izhor etamiz.

- Teatrimiz nafaqat Qirg‘izistonda, balkim butun Markaziy Osiyodagi noyob san'at muassasasi hisoblanadi. Uning o‘ziga xosligi shundaki, 100 yilga yaqin davr mobaynida o‘z an'analariga sodiq qoldi: qirg‘iz san'atini O‘zbekistonda va o‘zbek san'atini Qirg‘izistonda targ‘ib qilib, qo‘shni, qardosh davlatlar o‘rtasida do‘stlik ko‘prigi vazifasini ado etib kelmoqda. Teatrning qirg‘iz va o‘zbek xalqlari madaniyati tarixidagi alohida xizmatlari hana shundadir, - deydi teatr direktori Nabijon Mamajonov.

Teatr Bishkek, Toshkent, Dushanbe, Olmaota, Andijon shaharlarida o‘tgan Xalqaro teatr festivallarida “Sohibqiron”, “Chingizxon olib ketgan sir”, “Cho‘lpon”, “Zo‘rdan zo‘r chiqsa”, “Malikaning ko‘z yoshi”, spektakllari bilan qatnashib, sovrinli o‘rinlarni egalladi. Teatr jamoasi O‘zbekistonda, Tojikistonda, Qozog‘istonda, Sankt-Peterburgda, Turkiyada gastrol safarlarida bo‘lgan.

“Aykel Manas” spektakli aktyorlarning mohirona ijrosi, dekoratsiyaning tarixiy manbalar asosida yaratilgani, musiqaning voqelikka uyg‘unlashuvi bilan tomoshabinlar mehri va olqishini qozondi.

Qirg‘iz xalqining milliy qahramoni donishmand Manas tarqoq qirg‘iz qabilalarini birlashtirishga intiladi, ularga vatanparvarlik va mardlikdan saboq beradi. Manas obrazini yaratgan Akmalxon Arslonxonov uning ichki dunyosi, falsafiy qarashlari, botirligi kabi fazilatlarini qiyomiga yetkazib ijro eta olgan.

“Aykel Manas” spektakli tomoshasida O‘zbekiston va Qirg‘iziston Respublikalari Bosh vazirlari o‘rinbosarlari Adham Ikromov hamda Jyenish Razakov, Farg‘ona viloyati hokimi Shuhrat G‘aniyevlar hozir bo‘ldilar.