AQSh Senatining qurolli kuchlar bo‘yicha qo‘mitasi rahbari Jon Makkeyn AQSh prezidenti Donald Trampni diktatorlik belgilarini namoyon etishda aybladi. Bu haqda Politico nashrida yozilgan.
«Diktatorlar matbuotga bosim o‘tkazishdan boshlashadi. Hukumat bir qo‘lda jamlanishini ta'minlashning birinchi yo‘li — OAVni bo‘g‘ishdir. Men Tramp diktatorlik qilmoqda demayapman. Shunchaki, tarix saboqlarini yoddan chiqarmaslik lozim», — degan Makkeyn.
Uning so‘zlariga ko‘ra, mamlakatda demokratiya saqlanib qolishi uchun erkin matbuotni saqlab qolish kerak, nashrlar esa bir-biri bilan raqobatda rivojlanadi.
Jon Makkeynga Oq uy rahbari New York Times nashri va bir qator yetakchi telekanallarni "amerikaliklar dushmani" deb ataganiga qanday munosabatdaligini so‘rab savol berishgandi.
