Pasport berish tizimi modernizatsiya qilinadi

O‘zbekiston Davlat personallashtirish markazi o‘z imkoniyatlarini modernizatsiya qiladi.

Vazirlar Mahkamasi qarori bilan Davlat personallashtirish markazi byudjyetdan tashqari hisob raqamiga O‘zbekiston Respublikasi fuqarolariga biometrik pasport, fuqaroligi bo‘lmagan shaxslarga biometrik hujjatlar taqdim etilgani uchun kelib tushadigan mablag‘larni xarajat qilish tartibiga tuzatishlar kiritildi. Bu haqda Norma xabar bermoqda. 

Endilikda, jumladan, mazkur mablag‘lar: 
- Biometrik pasport tizimini modernizatsiya qilish uchun import jihozlar va dasturiy ta'minot sotib olish (oldin — ishlab chiqarish jihozini ta'mirlash uchun ehtiyot qismlar xarid qilish);
- Biometrik pasport tizimi jihozlari va dasturiy ta'minotiga texnik xizmat ko‘rsatish qiymatini to‘lashga (oldin — faqat xorijiy pudratchilar tomonidan) yo‘naltirilishi mumkin.

Ma'lumot uchun, O‘zbekiston Respublikasi fuqarolariga biometrik pasportlar va fuqaroligi bo‘lmagan shaxslarga biometrik harakatlanish hujjatlari berganlik uchun davlat boji summasining 60 foizi miqdoridagi mablag‘lar Davlat personallashtirish markazining byudjyetdan tashqari hisob raqamiga tushadi.

Eslatib o‘tamiz, yaqin yillarda O‘zbekistonda pasport berish tizimida jiddiy islohotlar bo‘lib o‘tishi kutilmoqda. Xususan, ichki va xorijga chiqish pasportlari joriy qilinishi rejalashtirilgan.