Foto: Prezident Qarshidagi xonadonlardan birida

O‘zbekiston Prezidenti Shavkat Mirziyoyev Qashqadaryo viloyatiga safari davomida Qarshi tumanidagi xonadonlardan birida mehmon bo‘ldi.

O‘zA bergan xabarga ko‘ra, O‘zbekiston Prezidenti «Nukrobod» qishloq fuqarolar yig‘inining Yakkayog‘och massivida yangilangan namunaviy loyihalar asosida barpo etilgan uylardan birida — Alisher Ahmedov xonadonida bo‘lgan. Prezident bu yerda yashash uchun yaratilgan qulay sharoitlar bilan tanishgan, xonadon sohiblari bilan dildan suhbatlashgan.

«Yosh oila a'zolari Shavkat Mirziyoyevga e'tibori va g‘amxo‘rligi uchun samimiy minnatdorlik bildirdi», deyilgan xabarda.

«O‘z uy-joyiga ega bo‘lish har bir inson hayotida qanchalik muhim ekanini barchamiz yaxshi bilamiz. Xalqimiz uyi borning o‘yi yo‘q, deb bekorga aytmagan. Buning chuqur ma'nosi bor. Bunday uy-joylar taqsimotida xalqimizga xos haqiqat va adolat mezonlariga qat'iy rioya etilishi kerak», degan prezident.

Qurilish materiallarining tannarxini kamaytirish hisobiga uylarning narxini yanada arzonlashtirish, tashqi injyenerlik tarmoqlari – ichimlik suvi, ichki yo‘llar, elektr energiyasi va tabiiy gaz bilan ta'minlash, atroflarini obodonlashtirish bo‘yicha zarur ko‘rsatmalar berilgan. 

Shavkat Mirziyoyev Mirmiron massividagi yangilangan namunaviy loyihalar asosida qurilgan uylarda istiqomat qiluvchi aholi uchun issiqxona tashkil etish loyihasi bilan tanishgan. 

Ushbu issiqxona 25 gektar maydonda metal, taxta, plyonka va boshqa mahalliy qurilish materiallaridan foydalanilgan holda barpo etiladi. Bu yerda limon, mandarin va papayya kabi sitrus mevalar, pomidor, bodring, gulkaram, har xil ko‘katlar yetishtirilishi rejalashtirilgan. Ushbu loyiha amalga oshirilishi natijasida issiqxonada yiliga 3 milliard so‘mlik mahsulot yetishtiriladi. Ularning bir qismi ichki bozor talablarini qondirsa, qolgani eksportga yo‘naltiriladi. Natijada aholi qish mavsumida ham arzon meva-sabzavot mahsulotlari bilan ta'minlanadi. 229 ish o‘rni yaratilishi aholi turmush farovonligining ortishiga xizmat qiladi. 

Prezident bunday issiqxonalarni qurish va ulardan foydalanishda zamonaviy texnologiyalarni qo‘llash, ishga malakali mutaxassislar bilan birga kollej bitiruvchilarini ham keng jalb etish borasida zarur ko‘rsatmalar berdi.