Shimoliy Koreyaning BMTdagi a'zoligi to‘xtatib qo‘yiladimi?

Seul Pxenyanning Birlashgan Millatlar Tashkilotidagi a'zoligini to‘xtatishga chaqirdi. Bu haqda Janubiy Koreya tashqi ishlar vaziri Yun Byonse qurolsizlantirish bo‘yicha anjumanda ma'lum qildi, deb xabar bermoqda Reuters seshanba, 28 fevral kuni.

Bunga shimoliy koreyalik yuqori mansabli amaldorlarning Kim Chen Inning o‘gay akasi – Kim Chen Namning qotilligidagi ehtimoliy ishtiroki sabab bo‘ldi. U Malayziya poytaxti Kuala-Lumpur shahrida 13 fevral kuni o‘ldirildi.

«VX zaharli moddasining hattoki bir necha grammi [uning yordamida Kim Chen Nam o‘ldirildi] ham ommaviy qotillik uchun yetarli. KXDRda esa, bizning ma'lumotlarga ko‘ra, grammlar emas, balki tonnalab kimyoviy qurol yig‘ib qo‘yilgan, ular mamlakat bo‘ylab turli joylardagi omborlarda saqlanadi. Bu qotillik – barchamiz uchun tashvishli qo‘ng‘iroq bo‘lib, Pxenyan uni foydalanishdan tap tortmasligini ko‘rsatdi», - deya ma'lum qildi Yun Byonse.

Uning so‘zlariga ko‘ra, «barcha xalqaro institutlar, xususan BMT tomonidan jiddiy choralar qabul qilish imkoniyatini ko‘rib chiqish vaqti keldi». «Masalan, Shimoliy Koreyaning BMT a'zosi sifatidagi barcha huquq va imtiyozlarini to‘xtatib qo‘yish», - deya ta'kidlab o‘tdi vazir.

Kim Chen Nam Kuala-Lumpur aeroportida - Makaoda bo‘lgan oilasi yoniga uchib ketish chog‘ida o‘ldirilgandi. Malayziya sog‘liqni saqlash vaziri so‘zlariga ko‘ra, o‘lim VX asab-falajlovchi zaharli modda tufayli kelib chiqqan falaj tufayli ro‘y bergan.

Jinoyatga aloqadorlikda gumonlanib Indoneziya, Myanma (boshqa ma'lumotlarga ko‘ra - Vetnam), Malayziya, shuningdek Shimoliy Koreya fuqarolari hibsga olindi. Bundan tashqari, KXDRning to‘rt nafar fuqarosi qidiruvga e'lon qilindi.