AQSh prezidenti Donald Tramp Breitbart News nashri uchun bergan intervyusida ma'lum qildiki, «Oskar» taqdimotining bu yilgi marosimi yakunida ro‘y bergan chalkashlik shuni ko‘rsatadiki, Hollivud siyosatga ko‘p aralashib, o‘z ishini unutmoqda.
Bundan tashqari, Tramp taqdimot avvalgi hashamati va jozibasini yo‘qotganini qayd etgan.
«Menimcha, ular siyosatga juda ko‘p burun tiqishmoqda va hech nimaga erisha olishmayapti. Bu biroz qayg‘uli holat. Avvalgi «Oskar» endi yo‘q. Bugungi kecha ajoyib o‘tgandi deya olmaymiz», — degan amerikaliklar yetakchisi.
Tramp o‘z vaqtida kino olamidagi eng yorqin taqdimotga tashrif buyurgani haqida qo‘shimcha qilgan.
«Bu safargi taqdimotda qandaydir o‘zgachalik yetishmadi, xotima esa ayanchli bo‘ldi», — deya qayd etgan siyosatchi.
Eslatib o‘tamiz, marosim chog‘ida sahnadan «Eng yaxshi film» nominatsiyasida «La-La Lend» g‘olib bo‘lgani haqida e'lon qilinganidan bir necha daqiqa o‘tib, «La-La Lend» ijodkorlari minnatdorchilik so‘zlarini izhor etayotgan mahalda tashkilotchilar sahnaga chiqib, xatolik yuz berganini aytgandi. Ma'lum bo‘lishicha, tashkilotchilar konvertlarni chalkashtirib yuborgan, va aslida esa eng yaxshi kartina deya «Oy shu'lasi» e'tirof etilgan.
