Daimler 1 mln dona Mercedes modelini qaytarib olmoqda

Germaniyaning Daimler AG  konserni butun dunyo bo‘ylab bir millionga yaqin Mercedes-Benz avtomashinalarini qaytarib olishga qaror qildi. Bunga mashina dvigatellarida yong‘in yuz berishi holatlari kuzatilgani sabab bo‘lmoqda, deb xabar qilgan Reuters agentligi.

Ma'lumotlarga ko‘ra, jami 51 holat qayd etilgan, shundan 30tasi AQShda kuzatilgan. 

Kompaniya S va Ye tasnifidagi hamda SLA, GLA va GLC turkumidagi 2015-2017 yillarda ishlab chiqilgan mashinalarni qaytarib oladi. Ta'kidlanishicha, AQShning o‘zida 300 mingdan ortiq mashina chaqirib olinadi. 

Shu bilan birga, Daimler kompaniyasi qarori yana qaysi mamlakatlarga tegishli ekani haqida ma'lumot berilmagan. Kompaniya ushbu qaror xususida mart oyi oxiridan mijozlarni xabardor qila boshlaydi. Dilerlar dvigatellarni tekshiruvdan o‘tkazib, ortiqcha kuchlanishdan saqlagichlarni almashtirishadi.