Volkswagen AQShdagi «dizel mojarosi» bo‘yicha aybini rasman tan oldi

Germaniyaning Volkswagen AG avtokonserni AQSh sudida shov-shuvli "dizel mojarosi" bo‘yicha odil sudlovga yo‘l qo‘ymaslik, oldindan til biriktirish va moliyaviy firibgarlik kabi jinoyatlarni sodir etganligini tan oldi. Bu haqda AQSh adliya vazirligi xabar qilmoqda. 

Yanvar oyida Volkswagen AG Amerika hukumati bilan 2,8 milliard dollar miqdoridagi jinoiy jarima to‘lash masalasini kelishib olgani xabar qilingan edi. Mazkur kelishuv doirasida kompaniya AQSh qonunchiligida belgilab qo‘yilgan uch holat bo‘yicha o‘zini aybdor deb tan olishi talab etilgan edi. 

Adliya vazirligining xabariga ko‘ra, VW kompaniyasiga nisbatan hukmni 21 aprel kuni Detroyt federal sudi e'lon qiladi. 

Kompaniya, shuningdek, 2,8 mlrd dollarlik jarimadan tashqari federal, ekologik va boshqa fuqarolik ishlari uchun 1,45 milliard dollar miqdorida jarima to‘laydi. O‘zaro kelishuv shartlariga ko‘ra Volkswagen yana 50 million dollarni moliyaviy idoralar xususidagi FIRREA qonuni talablari bo‘yicha to‘laydi.