CNN telekanalining Pentagonga tayanib xabar berishicha, AQSH mudofaa vaziri Pit Hegset Hasanni otuvchilar guruhi yordamida qatl etishni tavsiya qilgan, Tramp esa bu qarorni tasdiqlagan. Mudofaa vazirligi matbuot kotibi Shon Parnellning soʻzlariga koʻra, «2009-yilda Fort-Hudda qurolsiz amerikalik askarlarga qarata oʻt ochgan jihodchining» qatl etilish vaqti va joyini Hegset belgilaydi. Parnell shuningdek quyidagilarni qoʻshimcha qildi: «U 13 kishini oʻldirdi va yana 32 kishini yaraladi. Nihoyat, Hasan uchun jazo kuni yetib keldi».
AQSH armiyasi mayori va psixiatr boʻlgan Hasan 2013-yil iyul oyida qasddan 13 odamni oʻldirish va 32 ta qotillikka suiqasd qilish holatlari boʻyicha aybdor deb topilgan. U aybini tan olgan va «har qanday xatolar» uchun uzr soʻragan edi.
Oʻlimga hukm qilingan shaxs - kelib chiqishi falastinlik boʻlgan AQSH fuqarosi. U oʻzining maqsadi «noqonuniy urushda» ishtirok etish uchun Afgʻonistonga joʻnatilishi kerak boʻlgan askarlar ekanini aytgan edi. 2009-yilda u Fort-Hud bazasida tibbiy koʻrikdan oʻtish uchun toʻplangan harbiy xizmatchilarga qarata oʻt ochdi. Politsiya bilan boʻlgan otishmada Hasan jarohat oldi va belidan pastki qismi falajlanib qoldi. Hozir u nogironlar aravachasida harakatlanadi.
Amerika armiyasining otuv bilan qatl etilgan soʻnggi askari Eddi Slovik boʻlgan. Bu voqea 1945-yilning yanvarida Fransiyada yuz bergan, deb qayd etdi CNN. Oʻshanda harbiy tribunal uni qochqinlikda aybdor deb topgan. Shu bilan birga, telekanalning taʼkidlashicha, Ikkinchi jahon urushi davridagi 50 mingga yaqin amerikalik qochqin harbiylar ichida faqatgina Slovik qatl etilgan. General Duayt Eyzenxauer Yevropa frontidagi hal qiluvchi janglar ayni qizigan pallada qochishni oʻylaydigan boshqalarga ogohlantirish boʻlishi uchun ushbu hukmni ijro etishga buyruq bergan.
«Qochqinlar» kitobi muallifi, jurnalist Charlz Glass 2013-yilda otib oʻldirilgan oddiy askar «yomon jangchi boʻlmagani, u shunchaki qoʻrqib ketgani» va buning ustiga hokimiyatga oʻz ixtiyori bilan taslim boʻlganini aytgan edi. Glassning soʻzlariga koʻra, Slovikning xotiniga qatl haqida maʼlum qilishmagan, balki unga «eri Yevropada halok boʻlgani»ni aytishgan.
1961-yilda amerikalik harbiy xizmatchi ustidan hozirgi kunga qadar soʻnggi boʻlib turgan qatl ijrosi amalga oshirildi. Jon Bennet 11 yoshli qizni zoʻrlagani va oʻldirishga uringani uchun osib oʻldirildi.
Amerika qonunlariga muvofiq, AQSH harbiy xizmatchisiga chiqarilgan har qanday oʻlim hukmi oliy jazoni yengilrogʻiga almashtirish huquqiga ega boʻlgan prezident tomonidan tasdiqlanishi shart.
