Sergey Lavrov O‘zbekistonga keladi

Rossiya Federatsiyasi Tashqi ishlar vaziri Sergey Lavrov 7 aprel kuni O‘zbekistonga keladi. Rossiya TIV rasmiysi Mariya Zaxarova brifing chog‘ida ma'lum qilishicha, u Toshkentda bo‘lib o‘tadigan MDH TIV Kengashi yig‘ilishida ishtirok etadi.

Toshkentda bo‘lib o‘tadigan mazkur yig‘ilish 2017 yilda rejalashtirilgan Hamdo‘stlik oliy organlarining eng muhim yig‘ilishlaridan biri hisoblanadi.

Yig‘ilishda vazirlar davlatlararo hamkorlikni rivojlantirish borasidagi keng miqyosdagi masalalar va Hamdo‘stlikka a'zo davlatlarning tashqi siyosiy yo‘nalishlarini muhokama qilishadi. Shuningdek, kun tartibida turgan dolzarb tashqi siyosiy muammolar yuzasidan fikr almashish rejalashtirilgan.

Mustaqil Davlatlar Hamdo‘stligiga a'zo davlatlarning tashqi ishlar vazirlari musulmon, xristian va boshqa din vakillariga nisbatan kamsitish va toqatsizlik qilinishiga yo‘l qo‘ymaslik haqida qo‘shma bayonot qabul qilishlari MDH TIVKning bo‘lajak yig‘ilishi diqqat markazida bo‘lishi kutilmoqda.

Kun tartibidan shuningdek, MDH maqomini mustahkamlash bo‘yicha amalga oshirilgan ishlar, uning organlari ish samaradorligini oshirish masalasi muhokamasi joy olgan.

Vazirlar huquqni muhofaza qilish va gumanitar sohalardagi hamkorlik masalalarini ham ko‘rib chiqishi ko‘zda tutilgan.