Angrenda firibgar qo‘lga tushdi

Angrenlik Sherzod Ibragimov  jamiyat uchun foydali mehnat qilib kun ko‘rish o‘rniga, firibgarlikni o‘ziga kasb qilib oldi, deb xabar beradi Toshkent viloyati IIB.

Bu «ustasi farang» dastlab Jinoyat ishlari bo‘yicha Toshkent viloyati Angren shahar sudining 2016 yil 1 aprel kunidagi sud majlisida firibgarlik jinoyati sodir etganligi uchun sudlangan, keltirilgan zarar qoplanganligi sababli tomonlar yarashib, jinoyat ishi sud jarayonida tugatilgan. 

Ammo yaxshi otga bir qamchi, deganlaridek u o‘ziga tegishli xulosa chiqarish o‘rniga firibgarlik jinoyati bilan shug‘ullanishda davom etadi.  

2016 yil 16 dekabr kuni Angren shahar sudi tomonidan O‘zbekiston Respublikasi jinoyat kodeksining 168-moddasi 2-qismi «b» bandi bilan aybli, deb topilib, sud jarayonlari olib borilayotgan bir vaqtda Sherzod Ibragimov o‘ziga tegishli xulosa chikarmay, navbatdagi firibgarliklarni ham sodir etishdan tap tortmadi. 

U “ko‘mir mahsulotini olib beraman”, deb bir necha fuqarolarni aldab, ulardan naqd pul va plastik kartochkalarigi pullarini undiradi.  

Jumladan, Angren shaxar Samarchuq maxallasida yashovchi fuqaro Azamjon Mirzaliyevga jami 3 tonna saralangan ko‘mir mahsulotini olib  berishni va'da qilib, uni aldab, uning ishonchiga kirib, unga tegishli hisobida jami 900.000 so‘m pullari bo‘lgan plastik kartochkasini firibgarlik yo‘li bilan egallab olib, o‘zlashtirib yuboradi. 

Bundan tashkari  Sherzod Ibragimov angrenlik Ne'matulla Tashmatovning 700.000 so‘m puli bo‘lgan plastik kartochkasini hamda Ismail Sabirovning 920.000 so‘m pullarini firibgarlik  yo‘li bilan egallab olib, o‘z ehtiyojlari uchun ishlatib yuborgan. 

Hozirgi kunda Sherzod Ibragimovga nisbatan O‘zbekiston Respublikasi Jinoyat Kodeksining tegishli moddalari asosida jinoyat ishi qo‘zg‘atilib, tergov harakatlari olib borilmoqda.