Peterburg terakti ishi bo‘yicha o‘zbekistonlik ayol hibsga olindi

Moskvaning Basman tuman sudi Sankt-Peterburgda sodir etilgan teraktga aloqadorlikda gumon qilib O‘zbekiston fuqarosi Shohista Karimovani hibsga oldi. Tergovchilar uning uyida granata va portlovchi moddalar topilganini ma'lum qilganlar. “Tintuv vaqtida Karimovaning uyidan F-1 granatasi detonatori bilan va bomba detallari topildi”, deb tergovchilarning sudda bergan bayonotini keltirib o‘tdi «Interfaks» axborot agentligi.

Sud majlisida Shohista Karimova teraktni ijro etishda gumon qilingan Akbarjon Jalilov bilan birga bitta kafeda ishlaganini aytib o‘tdi. “Men «Lesnoye” kafesida ishlab shu yerning o‘zida yashardim”, degan Karimova.

Shoxista Karimovaning advokati uning jinoyatga xech qanday aloqasi yo‘qligini aytib o‘tdi. “Tintuv vaqtida qoidabuzarliklarga yo‘l qo‘yilgan. Bu granata va detonator uning uyiga ataylab tashlab qo‘yilgani ochiq-oydin ko‘rinib turibdi”, deb aytib o‘tdi himoyachi. Uning aytishicha, tintuv joyiga tergovchidan oldin tezkor xizmat xodimlari kelishgan. “Men bunaqasini avval eshitmagandim. Granatani ayollar sumkachasidan topishgan emish”, degan advokat. Advokatning ta'kidlashicha, uning mijozi Jalilovni tanimas edi.   

Avvalroq Basman sudi Sankt-Peterburgdagi terraktga aloqadorlikda gumon qilingan 8 nafar shaxsdan biri – Tojikiston fuqarosi Sodiq Ortiqovni hibsga olgan edi.