Ramzan Qodirov AQShning Suriyaga bergan zarbasini qoraladi

Checheniston rahbari Ramzan Qodirov AQShning Suriyadagi Shayrat aviabazasiga bergan raketa zarbasini keskin qoraladi va AQSh o‘z harakatlari bilan terrorchilarga yo‘l ochib berayotganini aytdi.

"Harbiy kemalardan uchirilgan raketalar ko‘plab fuqarolarning qonini to‘kdi va IShIDga saxiy sovg‘a tuhfa qildi – Bashar Asadning shundoq ham zaiflashgan armiyasi 10 tagacha samolyot yo‘qotdi. Terrorchilarga yo‘l ochildi. AQSh hech qachon xalqlarga tinchlik va erkinlik olib kelmagan. Ularning aybi bilan millionlab vetnamliklar, afg‘onlar, iroqliklar va liviyaliklar halok bo‘lgan. Aynan ular Xirosima va Nagasakini bombardimon qilgan. Biroq butun dunyo AQShga qarshi ovoz ko‘tara olmaydi. Barcha mum tishlab, faqat "afsuslanish" haqidagi so‘zlar bilan cheklanadilar", deb yozdi Qodirov Instagram’da.

Qodirov AQShning Suriyaga zarbasini xalqaro huquqqa tahdid va unga amal qilmaslik deb atadi. Uning ta'kidlashicha, zarba berishga sabab bo‘lgan Suriya hukumatining kimyoviy hujumga aloqadorligi isbotlanmagan.

"Bu qurol Asad buyrug‘i bilan qo‘llanganiga isbot qani? Kimyoviy hujumni o‘zi uchun eng og‘ir damlarda qo‘llamagan Asad uchun bu hujumning nima keragi bor? Asad kimyoviy hujumdan nima yutadi? U bunday qilsa, butun dunyo bu ishini qoralashini, keskin choralar bo‘lishi mumkinligini biladi", deb qo‘shimcha qildi Checheniston rahbari.

Uning fikricha, AQShning Suriyaga nisbatan harakatlari va tinch aholining halok bo‘lishi Yevroparlamentni ham, PASeni (Yevropa kengashi parlament assambleyasi) ham tashvishlantirmaydi. Biroq bu tashkilotlar Rossiyaning "har bir aksirishiga ham" munosabat bildiradi. Checheniston rahbari Rossiyaning Suriyadagi ixtilofni hal qilishdagi rolini ham ta'kidlab o‘tdi. Uning aytishicha, Rossiya koalitsiyaning barcha davlatlari qila olmagan ishni yakka o‘zi qila oldi: Rossiya evaziga IShID zaiflashdi, muzokaralar jarayoni olib borilmoqda, shaharlar ozod qilinmoqda, aholiga ko‘mak ko‘rsatilmoqda.