Shavkat Mirziyoyev Toshkentda yo‘lga qo‘yiladigan yangi transport turi loyihasi bilan tanishdi

O‘zbekiston Prezidenti Shavkat Mirziyoyev 8 aprelda Toshkent shahrida jamoat transportining yangi turi – elektrichka qatnovini yo‘lga qo‘yish loyihasi bilan tanishdi. Bu haqda "Axborot" ko‘rsatuvida ma'lum qilindi. 

Ushbu transport turi Toshkent halqa yo‘li bo‘ylab qatnovni amalga oshirishi rejalashtirilgan. Loyiha qiymati 265 mln dollarni tashkil qiladi. Ushbu liniyaning ikki yo‘nalishi bo‘ylab 10 ta elektrichka (har bir yo‘nalishda 5 tadan) harakatlanadi. Yo‘nalish davomiyligi taxminan 1 soatni tashkil qiladi.  

Ushbu transport turini yo‘lga qo‘yish rejasi haqida Shavkat Mirziyoyevning Toshkentdagi saylovchilar bilan saylovoldi uchrashuvida ilk bor ma'lum qilingan. O‘shanda loyihani amalga oshirish 2017-2030 yillarga mo‘ljallangani ma'lum qilingandi.

Elektrichka harakatlanadigan yo‘l uzunligi 71,2 kilometrni tashkil qiladi (ikki yo‘nalish bo‘yicha 140 km dan ko‘proq) va u bo‘ylab 26 ta stansiya barpo etiladi. 

Ma'lum qilinishicha, elektrichka liniyasi avtobus yo‘nalishlari, metro stansiyalari va boshqa transport turlari bilan qulay bog‘lanadi. Loyihani ishlab chiqishda xorijiy davlatlar tajribasi hisobga olingan.