Cadillac Tesla raqobatchisini namoyish etdi  

General Motors kompaniyasi Cadillac CT6 modelini namoyish etdi. U 2017 yilning kuzida chiqariladi va GM’ning Super Cruise funksiyasiga ega birinchi avtomobiliga aylanadi. Ishlab chiqaruvchiga ko‘ra, bu haydovchiga yo‘lda harakatlanganda rulni qo‘yib yuborish imkonini beruvchi ilk transport vositasi bo‘ladi.

Tesla kompaniyasining Autopilot’i qo‘llar doimo rulda bo‘lishini talab qilsa, yangi Cadillac’da yo‘lga qarashning o‘zi yetarli bo‘ladi. Infraqizil kamera haydovchi boshining holatini kuzatib turadi. Agarda qurilma haydovchi e'tiborini yo‘qotgan, deb hisoblasa, tovush va nur signallarini ishga tushiradi. Xavf paydo bo‘lganda esa avtomobil avtomatik ravishda to‘xtaydi.

Biroq Super Cruise funksiyasidan alohida avtoyo‘llarda foydalanishga ruxsat beriladi. Bu yo‘nalish bo‘yicha Tesla yetakchilik qilmoqda, unda Autopilot ancha ko‘proq holatlarda faollashtirilishi mumkin.

Super Cruise uchun qo‘shimcha tarzda 2,5 ming dollar to‘lash talab etiladi. Cadillac CT6’ning o‘zi esa kamida 66 290 dollarga tushadi.