Toshkent viloyatida talonchilar qo‘lga olindi

Toshkent viloyati Angren shahrida 3 nafar noma'lum shaxslar ishdan chiqib, oilasiga shoshilgan 1975 yilda tug‘ilgan D.Karimovni tunab ketdilar, deb xabar bermoqda O‘zbekiston Respublikasi IIV matbuot xizmati

Jabrdiyda fuqarodan 450 000 so‘m puli va “Nokiya” mobil telefoni bo‘lgan sumkasini tortib olib, qo‘lga kiritgan jinoyatchilar shu onda ko‘zdan g‘oyib bo‘lishga urinishadi. Lekin buzoqning yugurgani somonxonagacha deganlaridek, ular ham uzoqqa borisha olmadi. Ichki ishlar xodimlarining tezkor harakatlari natijasida talonchilar qo‘lga olindi. 

Eng achinarlisi, biri 55, ikkinchisi 40 yoshni qoralagan bu kimsalar endi 20 yoshdan oshgan o‘z mahalladoshi Furqat ko‘chasida yashagan D.Majidovni jinoyatga undagan. 

Ularga nisbatan O‘zbekiston Respublikasi Jinoyat Kodeksining 166-moddasi 1-qismi bilan jinoyat ishi qo‘zg‘atilgan. Tergov harakatlari olib borilmoqda.