Turkiyaning amaldagi prezidenti Rajab Toyib Erdo‘g‘an mamlakat konstitutsiyasiga o‘zgartirishlar kiritish bo‘yicha referendumda ovoz berdi. U Istanbuldagi saylov uchastkasida bo‘lgan.
«Bizda avval ko‘p marta referendum o‘tkazilgan, ammo bunisi — alohida. U mamlakat rahbariyatida o‘zgarishlar amalga oshirishga qaratilgan. Turkiya yetarlicha rivojlangan, ammo endi unga yangicha impuls kerak. Umid qilamanki, xalq buni amalga oshirishni yoqlab ovoz beradi», — degan Erdo‘g‘an.
Shu vaqtga qadar turkiyalik ko‘plab taniqli siyosatchilar ovoz berish jarayonida ishtirok etishdi. Jumladan, mamlakat bosh vaziri Binoli Yildirim Izmirdagi saylov uchastkasida bo‘lgan. U referendumda «ha» yoki «yo‘q» deganiga aniqlik kiritmagan. Avvalroq u referendumning har qanday natijasiga tayyorligini bildirib o‘tgandi.
Bugun Turkiya fuqarolari mamlakat konstitutsiyasiga 18ta o‘zgartirish kiritish bo‘yicha loyihaga munosabatini bildirmoqda. Islohotlar paketidagi asosiy jihat — boshqaruvning prezidentlik shakliga o‘tishi bo‘yichadir.